踏入二○一八年，香港似乎仲未走出「低壓槽」，尋日出爐嘅全球快樂指數排名就係最佳證明嘞，香港躋身十大不快樂國家及地區之一，只係好過戰亂頻仍嘅第三世界少少咋，問你點頂。
係咁嘅，美國一個民調機構訪問咗全球五十五個國家及地區共五萬多人，睇吓佢哋過去一年是否快樂，香港赫然喺最不快樂國家及地區中排名第七，淨快樂評分更只有二十九分咁大把，同南非、土耳其同分，叫做比最不快樂嘅伊朗、伊拉克及烏克蘭高分啲嘅咋。
該煨咯，伊朗、伊拉克及烏克蘭呢啲地方出名立立亂，唔係內戰就係恐襲，香港竟然淪落到同佢哋為伍嘅地步，唔悲哀就假。睇吓份報告點講喇，原來香港喺「淨希望評分」只得十分，「淨經濟樂觀評分」更跌穿正數，得負十一分，有近兩成港人自覺不快樂。枉林鄭月娥早前份施政報告仲話「一起同行，擁抱希望，分享快樂」喎，家陣咪畀香港人摑咗一巴掌囉。
唔係咩，香港人對前景冇希望，經濟問題更係不快樂之源，講到尾就係港府做得差。睇吓房屋問題咪知囉，港府拓土建屋無計，一味加辣招壓抑樓市狂飆，結果適得其反，市民唔飲唔食十八年先至買到一個豆腐膶咁細嘅單位，連基本生活所需都變成奢侈品，有乜可能快樂呀。冇錯，香港經濟係就係年年都有所增長，弊在貧富懸殊同樣不斷惡化，家陣仲衰到五個港人一個窮，向上流動階梯愈來愈狹窄，連昔日嘅天之驕子都不再吃香，大學生在職貧窮仲創下新高添，唔絕望至奇喇。
再講吖，香港人又點止對衣食住行閉翳呀，醫療、教育、安老一樣令人愁，話口未完啫，又有一位十四歲女生疑不堪考試壓力跳樓身亡，聽到人心都噏埋。最離譜係港府財政儲備雄厚，正一肥到襪都着唔落，偏偏嫌貧愛富，將醫療及安老責任推得就推，卸得就卸，郁啲就話結構性財赤，郁啲就推畀私營市場解決，講多兩句就話市民「民粹」、「唔理性」，總之港府高官永遠係啱嘅，市民谷埋谷埋，佛都有火喇。
當然嘞，講到最唔快樂嘅原因咯喎，點可以唔提無日無之嘅政治爭拗吖。自從佔中一役，社會撕裂，法治被毀，唔同陣營嘅人日嘈夜嘈，小小事就大吵大鬧，乜都要政治化，市民耳根受罪，長此以往，屈到抑鬱都似。
古人話，「萬事到頭都是夢，休休。明日黃花蝶也愁。」香港人何嘗唔想一切亂象都係一場夢吖，可惜生活仍要繼續，港府再唔諗計發展經濟改善民生，修補社會裂痕，怕且唔使幾耐，香港就可以超越伊朗，成為另類世界之最咯。