狄更斯名著《聖誕頌歌》裏面嘅主人公、吝嗇鬼史高治最憎過聖誕節，事關大破慳囊買禮物同人「分享」，唔嬲就假。照咁睇嚟，同樣係孤寒財主嘅港府，應該最怕每年一度公布財政預算案，班刁民見庫房水浸，又話要「派糖」又話要「紓困」，睇見都眼冤！
港府到底幾有錢？波叔尋日發表網誌自爆，今個財政年度首八個月嘅綜合盈餘高達五百七十二億港元，較原來全年盈餘預測嘅一百六十三億港元，高出一大截，預計本財政年度最終錄得嘅財政盈餘會相當高。有人估計港府財政儲備今年度隨時衝破一萬一千億元大關，再創歷史新高，睇嚟應該幾近磅。
正所謂，狗咬人唔係新聞，人咬狗至係新聞，港府由鬍鬚曾做財爺嘅年代開始，基本上年年估數年年錯，而且愈錯愈離譜，以致財政預算案被譏為「財政失算案」，家陣波叔估錯數，只不過係承襲惡劣傳統，冇乜咁出奇。至於點解「失算」，無非又係賣地成績理想、股市暢旺、經濟增長勝預期等三幅被，市民倒轉都識背。
家陣市民最關心嘅係，港府坐擁金山銀山，肥到着唔到襪，會唔會開倉濟民？早排波叔接受內地官媒採訪，話「有一部分錢確實可以用」，之不過大家以為港府會大手筆派糖，又似乎開心得太早。事關佢老哥篇網誌已經講到明，善用盈餘嘅同時，會考慮喺投資未來、增加經常性開支、提出短期紓緩措施之間取得適當平衡，為整體社會長遠需要未雨綢繆，而唔係淨係做博取一時掌聲嘅短期措施。
嗱，聽到未呀？波叔打定預防針，睇怕市民都係希望愈大，失望愈大。盛傳新一份預算案有「三不搞」，其中一個「不搞」就係唔會重推代繳公屋租金，成份預算案嘅取態，可思過半。當然喇，做戲點都要做全套，呢輪波叔接見各大黨派，聽取對預算案嘅意見。有人提議針對首次置業自住嘅永久居民減一半印花稅；有人提議寬減薪俸稅同個人入息稅，港府會唔會從善如流，好快就有分曉。
政府有錢唔可以亂揈，短期紓困同長遠投資未來，兩者不可偏廢，呢一點冇人反對。問題係遠水難救近火，基層市民餐搵餐食，朝不保夕，你居然同佢描繪未來美麗願景，同晉惠帝「何不食肉糜」有乜分別？再講吖，港府搞埋晒咩「未來基金」、「房屋儲備金」，並非一朝一夕可以見效，反而會令市民覺得喺度玩「左袋交右袋」，庫房帳面少咗錢，咪大條道理撳住荷包咯！
一句講晒，財散則民聚，財聚則民散，繼續做守財奴，盞激發民怨，引火上身嘅咋！