喺電影裏面，黑幫頭子坐完幾年監出番嚟，都會同人講自己「去咗赤柱度假」，呢個就係阿Ｑ式精神勝利法。勢估唔到嘅係，世上真係有人當坐監係度假，幾乎影埋相po上網開心些牙咁滯，冇錯喇，功夫茶講緊嘅之唔係以政治犯自居嘅「雙學三子」囉！
好似黃之鋒咁，保釋出嚟冇耐即不改其齜牙鬆弶牙擦擦本色，投訴喺獄中曾被要求剝晒衫，踎低身仰頭回答長官提問，而懲教署方面嘅回應係，在囚人士待遇一視同仁，有唔滿意嘅可循正常渠道投訴。
之鋒哥唔好唔記得，自己嗰陣時係階下囚，唔似得有人出埋錢畀佢周遊列國唱衰香港咁疏乎過癮。監獄裏面有規有矩，講求紀律，囚犯步操都要聽阿Sir號令啦，唔通掉番轉頭長官剝晒衫踎喺度聽你訓話咩！
嗱，大家咪睇黃之鋒平時指點江山，神氣活現，其實只不過係飯來張口、衣來伸手嘅港孩一名，黃爸爸都話喇，個仔平時喺屋企連摺被都唔識。不過冇計喇，洋鬼子吹到佢天上有地下無，又話係「當代思想家」，又話「最有影響力青年人」，末代港督肥彭甚至將佢同習大大相提並論，咁就難怪有人飄飄然忘乎所以，以為自己入監獄唔係受罰，而係「考察」獄情嘅「欽差大臣」，金口一開規矩都要為佢改變。
最難頂嘅係，之鋒哥好似發現新大陸咁，話「原來」坐監係要絕對服從命令，唔容許有獨立思考，又話曾經問懲教所方面點解頭髮長度需要限制喺六毫米以內，仲畀職員警告唔好煽動其他囚犯搞事添。
乜佢冇聽過「我無自由，失自由，傷心痛心眼淚流」咩？想自由自在無拘無束，使唔使整番間配備私人游泳池、健身室嘅六星級酒店過佢吖？有埋專人服侍，餵埋食飯幫埋手沖涼好未？至於剪頭髮，個個囚犯都係平頭裝o架啦，佢唔係連呢樣都想耍特權啩。講真，佢之前成日畀人笑髮型似河童，反而獄中新look大獲好評，坐監坐到形象四正咗，咪算執到囉。
大家有眼睇，黃之鋒等人以「政治犯」自居，開口「打壓」，埋口「迫害」，實際上坐嘅卻係風流監，反對派政客假公濟私車輪式探監，「雙學三犯」終日安坐冷氣接待室，根本唔使參與勞動。羅冠聰就唔覺意爆響口，自己喺獄中可以專心寫作，已累積超過萬字存稿，再坐耐啲，睇怕連諾貝爾文學獎都有得攞！
始終都係呢句︰革命不是請客吃飯。唔講政治立場，「雙學三犯」抗壓力極低，吃少少苦就呼天搶地，旨意佢哋成就大事，慳番啖氣暖肚好過！