香港雖然係一個拜金城市，但同時亦係慈善之都，每有天災人禍，港人總係不吝伸出援手。可惜吖，隨着社會愈來愈政治化，新一代嘅同情心愈來愈薄弱，道德水平直線插水，悲天憫人呢支歌仔可能好快成絕唱咯。
冇誇張o架，淨係前排嘅高官喪子事件咋，有大學生喺校園公然貼出涼薄字句，已經夠晒經典；仲有喎，日前一名內地少女不幸被巴士輾斷腳，部分網民唔送上祝福都算喇，反而幸災樂禍，你話家陣啲後生仔仲邊有同情心同理心o架，仲邊識得易地而處o架，身為香港人，直頭「與有恥焉」喇。
嗱，有大學就本港中學生品格發展及社會心理適應進行調查，訪問咗二十間本地中學共二千四百多名學生，結果唔算令人意外，有五成學生認為有錢有尊重及賺錢最重要；兩成學生自認道德水平低落；另有兩成學生對別人不幸不太在乎；仲有近一成八人覺得自己啱嘅話，唔會聽人意見添。睇到喇，金錢至上，唯我獨尊，懶理別人感受，已經係部分年輕人嘅主流思想，長此以往香港會變成點？真係冇眼睇咯。
咁當然，年輕人拜金嘅作風，其實係整個社會嘅共業。香港不嬲係商業城市，競爭激烈，由家長到學校都不斷強調贏在起跑線，連電視節目都話「有樓有高潮」，有乜辦法唔搞到班學生哥個個將錢財同成就掛鈎吖。之不過咁，有錢唔等於冇品，更唔等於冇同情心，古今中外一樣有好多富豪為善最樂，美國首富蓋茨廿年來就捐出五千億港元身家，香港富豪亦造福唔少貧困家庭，偏偏家陣啲後生仔對旁人不幸毫無感覺，事事以自己為先，你話唔係教育嘅錯，唔係社會政治化嘅錯，搵鬼信咩。
真o架，近年香港亂事一浪接一浪，年輕人企喺反中亂港最前線，唔係無緣無故嘅，而係應咗古人講嗰句：「教不嚴，師之惰。」好似佔中嗰陣，有幼稚園教師教育幼童警察都係壞人喎，咁細個就被灌輸仇恨思想，長大後又點會有同情心吖；又好似小學教師爆粗辱警事件，做老師做到粗口爛舌，唔誤人子弟至奇喇。至於佔中搞手「戴妖」家陣仲喺大學任教，不斷鼓吹違法達義歪風，搞到部分學生有樣學樣，鍾意打橫行就打橫行，鍾意鬧邊個就鬧邊個，變到目中無人就係咁解。
教育家梁啟超講過：「少年強則國強，少年智則國智。」照咁睇，香港前途真係一片黯淡。冇計喇，港府弱勢無能，反對派歪理連篇，國民教育跪低收場，佔中黑手逍遙法外，香港人嘅道德底線低處未算低又有乜出奇！