中環出更：行會成員評分低 林正財：唔使民調都知

希望大眾向政府表達心聲訴求

其實，喺嗰個民調當中，林正財嘅認知率都唔高，即係冇乜市民識得佢，因此冇得評分。雖則佢話知道行會成員評分低，但佢認為將市民聲音帶入政府，屬於行政會議嘅重要工作，無論市民對行會成員嘅評分係點，都要繼續有關責任喎。

政府因修訂《逃犯條例》惹起軒然大波，反修例嘅激烈衝突已持續超過三個月，就算政府話撤回修例，但衝擊行動仍未見有降溫嘅迹象，而政府早前就話司局長會走入社區，亦會構建平台同市民溝通，同市民直接對話。

林正財話，市民同政府永遠處於互動嘅，希望盡快展開有意義嘅溝通，政府亦希望藉互動嘅機會，思考點樣改變收集民意嘅機制，同埋點解唔明白市民嘅想法。佢仲話，唔會認為一次對談就可以解決哂所有社會事件，相信有得傾總比冇得傾好，希望市民大眾盡量向政府表達心聲同訴求喎。

卓妮