歌仔都有得唱︰「世上只有媽媽好。」好似堅強媽媽陳淑儀咁，囝囝細細個證實患血癌，治療期間丈夫又因為肝癌離世，好在陳媽媽冇放棄，囝囝最終成功接受親人捐贈骨髓，對於兩母子嚟講，可以齊齊整整，已經係母親節最好嘅禮物。
可惜吖，唔係每個母親都咁幸運，先後接受兩次換肝手術嘅鄧桂思，家陣仲喺深切治療部留院，繼續同病魔搏鬥。講起火都嚟，鄧桂思之所以搞成今日咁，完全係因為聯合醫院兩名專科醫生疏忽大意，開漏乙肝抗病毒藥所致，咁都唔止，出事後院方並冇按照機制向醫管局呈報，如果唔係家屬主動問起，可能到依家都仲係臭屎密冚吖。
庸醫唔單止害慘鄧桂思一家，仲連累埋千千萬萬等候器官移植手術嘅家庭。事關最近有人喺網上討論區發起「集體拒捐潮」，短短一個禮拜已經有二百四十幾個市民取消器官捐贈登記，平均每日四十人響應，仲多過今年年初單月數字，都咪話唔誇張。
又難怪市民咁(興)嘅，當局成日呼籲人發揮大愛精神，以生命延續生命，點知市民呢頭承諾捐贈器官救人，嗰頭啲庸醫連最基本嘅責任意識都欠奉，搞到病人無端「被移植」，浪費器官兼害人，咁多年嚟製造幾多悲劇，真係冇人話得埋。你知喇，部分港人觀念保守，捐贈器官意願本來已經唔高，依家再爆單咁嘅天大醜聞，乜信心都冇晒喇！
話時話，公立醫院之所以淪為市民望而生畏嘅閻王殿，除咗個別醫生欠醫德，更加因為整個制度出問題。就講番鄧媽媽呢單畸士，點解開錯藥咁大件事都可以隱瞞咁耐，咪就係因為醫醫相護囉。爆出今次大鑊後，無論醫管局抑或聯合醫院，第一時間唔係追究責任，而係幫涉事醫生搵藉口，唔係話醫生放假外遊，就係話怕影響家屬應考公開試，一味姓賴。唔講大家可能唔知，原來醫管局對醫生嘅懲罰最多只係停職、減薪或降職，醫生無論賴得幾甘都冇有怕。大家又不妨放長雙眼睇睇，醫管局今次所謂調查，到頭來又係走過場敷衍民意嘅咋。
本來病人仲可以向醫委會投訴嘅，問題係醫委會由業界主導，自己人圍喂威，市民想討回公道，仲難過秋菊打官司。年前藝人初生兒子不幸夭折，兩夫婦足足花近十年，幾乎散盡家財至叫做有個說法，就係最佳例子。最離譜嘅係，醫委會改革方案建議增加非業界代表比例，結果又畀政客喺立法會拉布拉死咗，咁都仲唔係醫醫相護？
始終都係領導人講得啱，要改革就要敢於啃硬骨頭。本港醫療制度改革都係一樣，一日唔向既得利益集團開刀，講乜都係嘥氣！