中大宿舍不設防 害怕監督為哪般

正所謂有片有真相，大家睇番東網記者拍嗰段片，明明宿舍門口雞乸咁大隻字寫住「宿舍範圍只限宿生進入」、「非宿生出入請登記」，點知原來只係得個樣，記者跟住一名宿生尾就可以輕鬆進入，整個過程都冇保安查問；而最離譜嘅係，連接男女樓層嘅後樓梯同電梯猶如無掩雞籠，男學生前往女生宿舍簡直「易過借火」，仲有女生浴室門口雖然有長期鎖門嘅提示，實際卻係「門常開」，真係睇見都牙煙。

其實學生會自己都識講，欣賞本報記者努力不懈追求真相，亦明白公眾知情權嘅可貴，依家本報嘅報道有根有據，堅過石堅，咪就係滿足咗公眾知情權囉。大家有眼見，大學宿舍淪為藏污納垢之所，早就備受詬病，依家居然發展到有學生公然喺宿舍隊草兼非禮，下次容乜易私藏軍火o架。須知大學係受公帑資助，公眾絕對有權作出監督，學生會嘅朋友不妨設身處地，問吓自己父母點睇，相信佢哋都會舉腳贊成。一句講晒，正義媒體揭露事實真相，分所當為，報喜不報憂唔單止係失職，更加係整個社會嘅不幸。

至於話「侵犯私隱」咯喎，更加不知從何說起，成個片段既無影到人樣，亦冇好似某啲不良傳媒咁，亂摷人哋垃圾桶嘅私人物品，保護學生措施做到好足，試問又何來「侵犯私隱」呢？

話時話，傳媒以放蛇形式揭露保安漏洞，喺外國例子多到數都數唔晒，根本唔係咩新聞。澳洲曾經有記者進入悉尼機場噴射機燃料庫，結果冇遇到任何檢查同探測，亦唔見有爆炸品或毒品嗅探犬；英國《太陽報》去得仲盡，該報曾派記者應徵做機場搬運工，闖入伯明翰國際機場並成功喺客機上安裝假炸彈，正正因為傳媒揭弊，最終至迫使機場當局改善保安。本報踢爆大學宿舍保安形同虛設，學生會多謝都冇句，反而怪罪傳媒「違背媒體職業操守」，點講都講唔過去！

嗱，成件事一清二楚嘞，本報根據事實作客觀報道，滿足公眾知情權之餘，實際上亦幫咗學生把關，學生會當務之急，係揦住東網呢段新聞片向學校當局大興問罪之師，嚴正要求佢哋盡快堵塞漏洞，而唔係反咬正義傳媒一口，大家話係咪？