「請問係咪陳先生，有人寄咗件包裹畀你」；「恭喜，閣下中咗獎」；「我係民政事務局主任，可以幫長者申請各項優惠同津貼」……如果大家收到呢類電話，千祈唔好以為真係咁着數吖，呢啲其實係近期肆虐本港嘅電話騙案手法，萬一上當受騙，隨時貪字得個貧吖。
唔係嚇你，電話騙案愈演愈烈，搞到人心惶惶。以前騙徒最常用嘅招數係「猜猜我是誰」，今日呢招已經out咗，新花招可以話五花八門，防不勝防。嗱，有主婦收到聲稱二奶嘅電話，提供網上連結叫事主瀏覽老公嘅合照，查實係想套取手機個人資料；有長者收到「民政事務局主任」來電，聲稱正提供老人優惠，其實係乘機騙取個人資料；有市民收到所謂信用卡中心職員電話，話中咗獎喎，實情又係呃神騙鬼。至於其他行騙手法，好似冒認中聯辦官員、內地公安、金管局、銀行、郵局職員等等，更加係屢見不鮮，沒有最荒謬，只有更荒謬。
有政黨上月底調查發現，四成七受訪者本身或親友曾經接聽過詐騙電話，即係每兩個人就有一個淪為騙徒目標，唔少受訪者更加承認中招導致財物損失添。調查顯示近九成人認為港府需要加強打擊電話騙案，但與此同時有超過九成人即使接到詐騙電話亦唔會報警。換句話講，市民對電話騙案多數採取啞忍，曝光嘅個案可能只係冰山一角嘅咋。調查機構促請港府重視問題，加強執法，並提醒市民提高警覺，以防誤墮老千局。
冇錯嘞，大意係騙徒嘅最好幫手。電話騙案雖然層出不窮，但萬變不離其宗嘅啫，唔係利用市民貪小便宜嘅心理，就係睇準事主驚惶失措時落手，只要大家提高警覺，便宜莫貪，騙徒就無從施其技喇。講到尾，小心駛得萬年船，尤其係接獲不明來歷嘅電話，更加要打醒十二分精神。
當然喇，要打擊電話騙案，除咗市民提高警覺，當局更加要提高執法力度。近年假扮內地部門行騙嘅案件愈來愈猖獗，淨係上個月警方已經收到七百多宗個案，當中二百多宗事主受騙，損失超過八千萬元，都咪話唔誇張。係人都知，呢類騙局涉及中港兩地，警方必須同內地加強溝通，緊密合作，至可以手到擒來。正所謂，時移勢易，騙徒都識不斷換新花款甚至利用高科技喇，當局如果唔識與時並進，又點樣打擊騙案呢？
話時話，今時今日世風日下，點止電話騙案猖獗。呢，近日有身穿香港郵政制服嘅假郵差喺沙田出沒，聲稱有掛號郵件要求市民簽收，然後藉機偷影市民身份證，作為下一步犯案嘅工具。騙徒猖獗成咁，港府唔想香港淪為「騙案之都」，唔該速速做嘢，唔好再兩頭望喇！