咪睇立法會議員平時大義凜然指摘政府部門大花筒，其實佢哋有口話人冇口話自己，自己使起公帑上嚟，分分鐘仲狼死。點解咁講？睇吓佢哋申領津貼咪知囉，大手大腳，一擲千金，面不改容，納稅人真係冤哉枉也。
嗱，立法會議員除咗每年可申領逾二百三十萬元辦事處營運開支，仲可以申領最多二十五萬元津貼，用作購買資訊科技及通訊設備。正所謂，有權唔用，過期作廢，咁大筆津貼擺喺面前喎，呢班代議士梗係唔會執輸喇。
本報翻查立法會議員過去一年嘅開支，發現部分人使用該筆津貼購買智能手機、平板電腦、相機及電視機。本來呢，用津貼購買電子產品冇乜出奇，奇就奇在議員們唔潮唔買，唔貴唔買，唔係名牌唔買。好似公民黨郭家麒咁吖，淨係同一品牌嘅手提電腦都買幾部。咁樣使錢法到底係有實際需要，定係為花而花，使盡最後一分津貼？你話呢啲唔係慷納稅人之慨都冇人信喇。
仲有喎，近日喺港大「等埋首副校長」風波中大出風頭嘅教育界議員葉建源，原來使起公帑上嚟都幾豪爽，唔止購買電子產品，連空氣清新機、雪櫃都唔放過，去年四月仲豪花四萬元購入大量傢俬，簡直將辦公室當正自己屋企咁款。綽號「盲毛」嘅公民黨毛孟靜仲離譜，去年佔領期間，竟然申報近八千元用於購買發電機、電油、鋁合金帳篷等，被質疑用於違法佔領。難為佢仲大玩語言偽術，聲稱「記憶中相關物品一定冇用於佔領區」喎，簡直侮辱公眾智慧，唔通香港會失驚無神大停電，搞到佢要自行發電兼用帳篷露宿街頭咩？
講到濫用公帑，班政客個個爭先恐後。多名身兼區議員嘅「雙料」立法會議員被踢爆濫用立法會開支津貼，淨係印製八達通套、尼龍扇、月曆呢啲另類「蛇齋餅糉」，已經高達六位數字，部分項目仲同區議會申領嘅津貼重疊添。難怪早前有議員助理抗議薪酬待遇太低喇，議員將大部分津貼用於印製宣傳品，議員助理想加薪都幾難。
喂！年底就係區議會選舉，有議員用立法會津貼印製地區報，上面列出疑似參選區議會嘅助理電話，擺明為黨友宣傳喇，咁做係咪假公濟私？動用立法會資源偷步宣傳，係咪違規？納稅人嘅血汗錢畀佢哋亂咁花，唔通議員真係可以無法無天？
一句講晒，議員以民意代表自居，批評政府往往滔滔不絕，振振有詞，其實係五十步笑一百步嘅咋。行政立法爛鬥爛，香港想有運行都幾難！