查斯古特無悔掛靴
祖雲達斯嘅法國傳奇射手查斯古特昨日第3度訪港，直言愈來愈愛這個魅力都市，尤其喜歡這裏的環境及食物，究竟查斯古特最鍾意食乜呢？答案就係食雞！呢位名將更是天南地北無所不談，自爆職業生涯最大遺憾係未贏過歐聯冠軍，講到佢兩個寶貝仔更加係眉飛色舞。
作風親民最愛食雞
過往好多球星來到香港，都會話好鍾意呢個城市，查斯古特亦唔例外：「香港係一個非常開放、充滿活力嘅城市，呢度高樓大廈好特別，最重要是有好多美食，今次嚟香港我好想行周圍覓食，盡量試多啲唔同口味，順道認識吓香港文化。」一講到食物，查斯古特即刻食神上身，滔滔不絕講食經，不過佢話最愛嘅並唔係魚蛋、蛋撻或者點心呢類地道美食，而係最愛食雞，仲話去餐廳一定會叫嚟食。
查斯古特更話來港3次，每一次都覺得香港球迷真是好擁護祖雲達斯，無論佢係以球員或球會大使身份訪港，球迷都非常熱情，所以「人對你好，你對人好」，查斯古特每次都會「黃大仙」上身，盡量滿足粉絲要求，幫佢哋簽名合照冇托手掙，表現勁親民。
講起囝囝即變慈父
被問到今年年初退役嘅決定，佢話一啲都唔後悔：「係時候作出改變，好開心可以以另一個身份重返祖記，之後想唔想做球隊主帥？依家答唔到你，我目前只係專心做好球會大使，邊做邊學啦！」查斯古特回想起佢20年職業生涯嘅點滴，雖然贏過世界盃、歐國盃同意甲冠軍，但最大遺憾是未捧過舉歐聯大耳盃：「2003年決賽，我覺得我哋係有機會捧盃，可惜最終互射12碼輸咗畀AC米蘭。」
贏唔到歐聯，咁佢兩個囝囝能否繼承衣砵，將來幫老竇完成心願？一講到囝囝，查斯古特即刻變成慈父上身：「大仔15歲，不過佢唔太鍾意踢足球，反而7歲嘅細仔對足球幾有熱情，不過我冇諗得咁長遠，只想佢哋踢得開心就OK啦！」