香港號稱「購物天堂」，本應係貨真價實，童叟無欺，令遊客買得開心又安心，可惜事實啱啱相反，近年到處都係購物陷阱，防不勝防，稍為大意隨時中招，開心就冇，激心就有！
嗱，又有奇聞嘞。一名內地女遊客光顧藥房，無睇價錢就購買包括兩支「特濃黑鬼油」等貨品，點知一睇帳單，至發現所謂嘅特濃黑鬼油每支盛惠一萬九千八百元，兩支合共三萬九千六百元，當堂嚇到目瞪口呆。女遊客要求退貨被拒，信用卡又已經過數，最後惟有報警求助，並向消委會投訴。佢話喎，今次經歷令佢對香港大失信心，以後唔會再來。
睇到咁嘅奇聞，唔知大家有咩感想。其實正如法律界人士話齋，消費者有責任問價，如果唔問清楚就付款，就算標價比市價高出百倍都好難追討，女遊客呢堂學費都算貴咯。所以話啫，外遊血拼唔止要識問路，更加要識問價，如果覺得有可疑，貨比三家都唔拘，最緊要唔好淪為羊牯吖嘛。尤其係隨着近年遊客急增，購物糾紛層出不窮，稍一不慎，好易中招嘅咋。試諗吓，今次就話標價萬九蚊啫，萬一下次標價一百九十萬蚊，咪隨時破產？
無論點都好，購物天堂招牌一再蒙污，必定會影響香港形象。正所謂，既要合法，亦要合理，貨品標明價錢唔算犯法，但唔代表道德上無問題。誠實係最有效嘅營商手法，商譽係最可靠嘅金漆招牌，做生意最重要係口碑，如果殺雞取卵，搞到遊客敬而遠之，想搵人幫襯都難喇。
話時話，香港購物陷阱處處，大家都見怪不怪咯。早前有廣州女遊客又係買藥出事，購買標價六百八十元嘅「金絲鳳尾草」，付款時至知標價以両計而非以斤計，結果埋單超過九萬蚊，被人劏到一頸血之餘，至發現根本無「金絲鳳尾草」呢種中藥材，問你怕未。
古人做生意重視「義中取利」，好多店舖門前都會貼上一副「鐵價不二、童叟無欺」嘅對聯，標榜貨真價實。人稱「亮財主」嘅清朝商人喬致庸就係典型例子，一生以「維護信譽、不弄虛偽」作為經商座右銘，旗下商號堅持所用嘅斗秤比市面一般嘅斗秤略計平畀顧客，以致口碑載道，客似雲來，生意愈做愈大，富甲一方。
所以話，民無信不立，做生意更加要講個信字。香港旅遊業正走下坡，如果再唔誠實待客，遲早齊齊食穀種嘅咋！