孫中山曾經講過，世界上有三種人，第一種係先知先覺，第二種係後知後覺，第三種係不知不覺。照咁睇，港產官僚胡混度日，反應遲鈍，分明屬於第三種喇。
呢，日前一場十二小時「長命」黃雨，全港共接獲四十五宗塌樹報告，遍及港九新界同離島，其中港島西半山般咸道一棵二十米高嘅百年老樹連根拔起，一名報販同菲傭走避不及，慘中頭獎，好彩只受輕傷。塌樹威力驚人，唔單止壓毀路經嘅輕型貨車，仲橫掃千軍，整冧埋鄰近大廈幾部冷氣機，冇搞出人命，都算係不幸中之大幸咯。
話時話，每次打風落雨，塌樹傷人已經係例牌菜，市民已經見怪不怪。可能有人會話，天有不測風雲，意外嘅嘢好難避免。冇錯，意外的確好難避免，但好多意外係人為引起，咁就唔同講法喇。好似今次塌樹咁，早就有迹可尋，舊年羅便臣道塌樹壓死孕婦慘劇後，本報曾列舉各區危樹，其中就包括今次倒塌嘅老樹。意外中受傷嘅報販亦話，曾向區議員同政府部門反映問題，點知路政署闊佬懶理，係咁意派人檢查就話冇即時危險，點知話口未完就出事。
咁就奇嘞，港府唔係成立咗「樹木辦」咩？家陣傳媒及街坊都睇到危樹，唯獨樹木辦班官老爺好似發緊夢咁，眾人皆醒官獨醉，咁仲唔係不知不覺？
咁都未算，有專家視察現場後估計，塌樹本來健康狀況良好，懷疑附近進行重鋪路面工程時，唔小心挖斷根部，搞到扶持能力大降，不敵強風吹襲。好明顯，今次意外涉及人為疏忽，絕對唔係天災咁簡單。
講開樹木問題，真係一匹布咁長。幾年前港大女生喺赤柱被大樹壓死，港府急急補鑊，一時成立跨部門嘅樹木辦，一時推出古樹名木冊，動作多多，可惜講就天下無敵，做就有心無力，咁多年嚟塌樹問題唔單止冇改善，反而不斷惡化，連申訴專員公署都忍唔住主動介入調查。最諷刺嘅係，包括今次倒塌嘅樹木其實都位列所謂古樹名木冊，唔怪得有人話，不如改名「危樹病木冊」好過。
見微知著，都市陷阱無處不在，樹木問題只係冰山一角咋。冧招牌、墮窗、升降機變跳樓機，甚至發展到連飲水都要「思鉛」……五花八門，鑊鑊新鮮鑊鑊甘，搞到市民提心吊膽，諗起都可悲。
始終都係古人講得啱︰「君子不立危牆之下。」咪話功夫茶唔提醒，雨季風季已經來臨，當局再唔打醒十二分精神，管好樹木，消除危機，隨時又爆大鑊嘅咋！