開講有話，逆水行舟，不進則退，做人係咁，營商一樣係咁。嗱，香港旅遊業不思進取，加上辱客醜聞不斷，結果就係停滯不前嘞，唔大步倒退已經偷笑咯。
美國著名旅遊休閒雜誌《Travel+Leisure》網站公布全球十大最佳旅遊城市，日本京都蟬聯桂冠，美國查爾斯頓位列亞軍，柬埔寨暹粒緊隨其後；泰國曼谷舊年因政變動盪跌出十大，今年捲土重來奪得第六位。至於香港咯喎，全球十大不入，連續第三年位居亞洲區第五位，即係原地踏步，反觀主要競爭對手新加坡由舊年第十位跳升至第六位，表現突飛猛進。
即係咁，香港旅遊城市排名維持亞洲區第五，表面上好似不過不失，實際上係不進則退，相形見絀。正如調查機構話齋，日本京都能夠畀旅客體驗日本文化，美國查爾斯頓以古老建築取勝，偏偏呢兩樣都係香港嘅軟肋。係人都知，香港開埠只有百幾年，被列為法定古蹟嘅建築物本來已經少如鳳毛麟角，點知港府仲要暴殄天物，保育變毀育，搞到景賢里等古老建築物面目全非，何來吸引力可言吖。加上近年樓價租金狂飆，營商成本不斷增加，購物天堂早就名不副實，傳統美食亦買少見少，旅客過門不入何足為奇！
學古人話齋，欲無後悔先修己，各有前因莫羨人，香港旅遊業停滯不前，岌岌可危，只能夠怪自己唔爭氣。旅遊業先天不足唔講嘞，後天失調更加濕滯，近年整個社會愈來愈政治化，激進勢力抬頭，中港矛盾惡化，三日唔埋就上演「驅蝗」、「光復」等趕客鬧劇，十足文革紅衞兵咁款，係旅客都怕怕喇。最匪夷所思嘅係，激進組織玩到無嘢好玩，居然連「跳大媽舞」都視為十惡不赦，驅之而後快，簡直到咗走火入魔嘅地步。雖然佢哋矛頭指向內地遊客，但係香港國際形象已經受損，「動感之都」淪為「動亂之都」，「好客之都」淪為「辱客之都」，有幾多人願意貼錢買難受吖。
再講，就算唔辱客，服務業水平每況愈下，前線人員固然好多唧都唔笑，企業管理更加烏煙瘴氣，一樣令人睇到都眼冤嘅咋。呢，國泰航空就係表表者喇，工潮爆完一鑊又一鑊，醜聞爆完一單又一單，負面新聞仲多過赤鱲角機場嘅曱甴，搞到聲名掃地，國際排名跌跌不休。嗱，繼早前喺全球最佳航空公司排名榜由榜首跌至第三位，國泰喺以上雜誌網站嘅最佳航空公司排名榜更由全球第三位降至第四位，呢啲唔知算唔算一沉百踩呢？
點講都好，旅遊業係香港嘅經濟支柱之一，繼續不思進取嘅話，莫講肥水流向別人田，拖累零售、酒店、飲食、物流等行業，整體經濟都會被拖累。上月整體旅客數字較去年同期下跌近兩個百分點，當中個人遊旅客更加跌咗一成，就係一個清晰警號，等香港變死港、臭港，後悔就遲嘞。