過而不改，是謂過；無恥之恥，無恥矣。政府部門敷衍塞責，烏龍百出，早就唔係新聞，但屢錯屢犯，永無改進，咁就真係令人莫名其妙嘞。尤其係幾個醜聞多多嘅部門，幾乎年年高踞投訴榜前列位置，唔到你唔服。
呢，申訴專員公署最新年報顯示，去年四月至今年三月底，共接獲一萬二千幾宗及五千三百幾宗查詢及投訴，主要涉及政府部門出錯、意見或決定錯誤、監管不力及延誤或冇採取行動等。投訴榜三甲位置係房屋署、食環署同地政總署，分別有四百八十三宗、三百五十二宗及三百一十九宗投訴，即係話呢幾個部門幾乎日日都接到投訴，有啲部門一日仲唔止一宗添。
呢個投訴榜係咪熟口熟面呢？冇錯嘞，呢幾個部門可以講係投訴榜常客，年年如是，年年不改。就講房屋署吖，除咗接獲投訴最多，近排更日日上頭版添。九龍灣啟晴邨被揭發食水含鉛超標之後，多個公共屋邨先後出事，連私家醫院亦可能中招，搞到人心惶惶。鉛水風波源頭何在，暫時不得而知，唯一可以肯定嘅係，房屋署對屋邨工程監管不力，絕對難辭其咎。最離譜嘅係，醜聞曝光後，房屋署開頭仲死撐食水冇問題，後來至死死地氣承認食水含鉛超標，你話係咪靠害吖？老實講，如果當日驗收樓宇認真啲、全面啲、負責任啲，又點會搞成咁吖！
至於食環署咯喎，今次成為投訴榜亞軍，同樣係實至名歸。大家都知道，呢個部門管理混亂，醜聞已成家常便飯，淨係員工偷懶蛇王個案咋，就幾乎厚過電話簿咁滯。早幾個月之嘛，灣仔盧押道一個由食環署外判商負責嘅垃圾收集站，就被踢爆員工「奉旨」遲到早退，有人上班時間比規定少咗近半，搞到垃圾堆積如山。灣仔區平均每月接獲一百五十宗投訴，高踞全港衞生黑點三甲位置，咪就係食環署好帶挈囉。
地政總署亦係半斤八両，香港寸土尺金，偏偏呢個主管土地嘅衙門守土無方，執法不力，搞到霸佔官地問題不斷惡化，每年多達八千幾宗，唔少個案拖延超過十年都未解決，簡直匪夷所思。
同樣值得一提嘅係，香港郵政接獲投訴數字似乎唔多，但「失信於民」嘅個案就唔少，其中三宗投訴經全面調查後，兩宗證實部分成立。
即係咁，政府部門出錯唔出奇，錯而不改至係大問題，唔少投訴個案竟然要申訴專員公署介入後部門至肯道歉。申訴公署話會研究制訂《道歉法》喎，其實計功夫茶話齋，與其制訂《道歉法》，不如制訂《責任法》仲好喇，係咪！