廉政公署以前嘅口號係「香港勝在有ICAC」，後來改為「香港勝在有你和ICAC」，即係反腐預埋「你」咁解。其實都好正常嘅，近年廉署醜聞多多，自身難保，唔預埋市民又點樣打擊貪污吖。
呢，今年首季咋，廉署接獲嘅貪污投訴就有五百八十八宗，比去年同期多咗百分之一，其中三成投訴係針對政府部門，可以追查嘅投訴大增百分之十一。廉政專員白韞六話喎，可以追查嘅投訴多咗，反映投訴嘅質素高咗，亦顯示市民對廉署有信心。
即係咁，貪污投訴尤其係可以追查嘅投訴上升，固然可以反映投訴質素高咗，但更加可以反映貪污問題嚴重咗，白韞六掉轉嚟講，聲稱市民對廉署有信心，只不過係自賣自誇嘅咋。最搞笑嘅係，華潤集團董事長宋林涉嫌嚴重違紀違法被內地當局免職調查，而佢之前曾出任本港多項公職，包括廉署道德發展諮詢委員會主席，貪官學人講道德，你話夠唔夠諷刺吖？白韞六仲話該委員會只係橋樑角色，唔會影響廉署形象喎，細路仔都唔信喇！
當然，相對於前特首曾蔭權爵士及前廉政專員湯顯明貪腐醜聞對廉署形象造成嘅損害，宋林事件亦的確係濕濕碎嘅。宋林涉及嘅貪腐醜聞發生於內地，而絕代雙貪嘅醜行多數喺香港發生，邊個對香港廉潔形象影響大啲，唔使問都知喇。最奇怪嘅係，當被問到貪曾及貪湯案嘅調查進展時，白韞六仲一味耍太極，聲稱根據正常程序進行，希望市民忍耐喎。其實，市民唔係唔想忍耐，而係貪曾案已經查咗兩年幾，貪湯案亦查咗年幾，到依家仲係無聲無息，完全唔合常理，好難唔令人質疑官官相衞啫。
正所謂，上有好者，下必甚焉，就係因為絕代雙貪其身不正，先至搞到香港烏煙瘴氣，當局再唔執正嚟做，市民對廉署點會有信心呢？唔係危言聳聽o架，舊年國際反腐敗組織透明國際公布嘅全球廉潔指數排行榜，香港排名再跌一級至第十五位，成為七年來最低，遠遠落後於排第五位嘅新加坡，簡直丟架。絕代雙貪佗衰家，搞到廉潔招牌危危乎，再咁落去，香港隨時同內地睇齊，一國兩制變成一國一制都似。
事實勝於雄辯，本港貪腐問題惡化有目共睹，白韞六與其粉飾太平，不如做好自己份工，盡快完成貪曾及貪湯案嘅調查，唔好再拖拖拉拉。嗱，要保住廉署金漆招牌，令市民恢復信心，其實好易嘅咋，只要攞出當年打擊貪污嘅決心，將所有貪官繩之以法，到時市民必定拍爛手掌，齊讚一聲：「香港勝在有ICAC」！