俗語話籠裏雞作反，係比喻自己人內訌，本來唇齒相依嘅合作關係，變成互相對立，結果往往兩敗俱傷。呢，最近香港出現真實版嘅「籠裏雞作反」，家禽業界內訌，搞到七國咁亂，雞農、雞販及市民統統成為輸家。
係咁嘅，由於內地H7N9禽流感仲未有平息迹象，港府繼續禁止輸入內地活雞，呢個係迫於無奈嘅措施，社會爭議不大，問題係禁雞令搞到業界雞毛鴨血，雞價飆升，怨聲載道。嗱，喺活雞供應持續減少之下，批發價近日由過年前嘅高位繼續狂飆，零售價閒閒地賣到二百蚊一隻，市民點食得起吖？雞販生意難做，無啖好食，索性一拍兩散，決定下星期一起停市，直至恢復輸入內地活雞為止。據講目前大約有五十個活雞檔及新鮮糧食店響應停市，佔全港一百三十個雞檔嘅四成，影響範圍遍及旺角、大角咀及將軍澳等多個地區，你話係咪七國咁亂吖？
批發價貴到飛起，活雞變金雞，成為業界分化嘅導火線。雞販指摘雞農趁火打劫，囤積抬價，雞農就大叫冤枉，反指雞販受內地活雞批發商煽動，想借停市逼港府提前恢復輸入內地活雞，總之就係雞同鴨講，傾唔埋欄喇。其實，無論誰是誰非，雞販停市，最終受害嘅始終係市民，雞販就話有得揀係咪參與停市啫，但係市民就無得揀，一係食無雞，一係食貴雞，講起都無奈。
正所謂，山雨欲來風滿樓，雞販停市一觸即發，當局點拆彈呢？食衞局局長高永文話喎，相關部門已經召開會議，就活雞供應嘅每個環節加強溝通，希望搭建平台畀各方互相對話，互相諒解咁話。其實，講多無謂，做嘢最實際，業界互諒互讓無疑好重要，不過最重要都係當局能唔能夠做好自己份工，盡快令活雞供應恢復正常。好簡單，打鼓嶺活雞分流站可唔可以快啲投入運作吖？如果繼續禁止內地活雞入口，供應唔增加咯喎，本地活雞批發價只會有升無跌，講乜都冇用喇。
咁講喇，雞販停市，大家受害，當局拆彈，切莫癡呆。各位港產官僚，今次拆彈唔好再雞手鴨腳嘞，須知業界內訌，除咗雞農、批發商、雞販、市民輸，港府亦係輸家嘅咋，一個連活雞供應都搞唔好嘅弱雞政府，唔畀人插到飛起都幾難！
話時話，做人要靈活，食雞亦要識得變通，家陣活雞價格飆升，市民不妨轉食冰鮮雞，一來順應時勢，二來唔使擔心禽流感吖嘛。一切講習慣嘅啫，冇活雞食，一樣可以過日子，你話係咪？