過而不改，是謂過矣。港產官僚無能唔係新聞，無能之餘又唔肯吸取教訓，以致不斷重複犯錯，咁至令人嘆為觀止。呢嗱，由於當局施政效率低劣，加上監管不力，搞到每項基建工程都一拖再拖，唔止嚴重延誤，而且嚴重超支，再咁落去，就算庫房水浸，都遲早畀官僚敗清光嘅咋。
講起都好笑，斥資近七百億元興建嘅高鐵工程，原來同豆腐渣冇乜分別，一場黑雨就搞到甩甩漏漏，嚴重延誤不特止，估計超支數以百億元計。港鐵賴天賴地賴人手不足，而港府高官更加不知所謂，一句「非常驚訝、意外同失望」就算數，擺明同港鐵互扯貓尾，互相卸責。聽吓市民有乜意見吖喇。「東方報業民意調查」顯示，對於高鐵嚴重延誤及超支，四成四受訪者狠批政府監管不力；兩成四認為勘探不足，設計欠完善所致；兩成一直指當局無能，無法解決人手及技術問題。
好嘞，高鐵醜聞未了，審計署又踢爆政府部門一籮籮爛帳，包括造價過百億元嘅八號幹線青衣段，因為路政署嘅工程合約出現錯漏，工程延誤十六個月，超支接近兩成，你話係咪多多錢都唔夠港府浪費吖？正如上述民調顯示，四成一受訪者批評部門做事粗疏不嚴謹；三成一指當局能力不足，辦事不力；兩成三認為涉及人為疏忽。
除咗基建嚴重延誤，港府將「盛事基金」變成「醜事基金」，更加匪夷所思。即係咁，當局注資二億五千萬元成立嘅盛事基金，被審計署踢爆監管不力，資助項目帳目不清，創造就業名不副實，引起一片嘩然。難怪五成六受訪者質疑基金用途變質，浪費公帑；兩成三批評監管鬆散欠全面；一成七直指基金對社會貢獻不大。
仲有呀，港府話就話房屋政策係施政重中之重，原來得個講字咋。審計報告踢爆房屋署十年內只能興建十七萬個公屋單位，根本達唔到長策會提出嘅二十萬個單位目標；而另一方面，港府又任由大量公務員宿舍空置，簡直暴殄天物。嗱，五成受訪者批評政府部門未能協調土地運用；兩成四直指建屋進度不理想；兩成一認為浪費土地資源。
唔怕唔識貨，最怕貨比貨。廣深港高鐵廣深段一百一十公里長，二○一一年已經通車，造價只需一百六十幾億元人民幣咋。反觀港府一味蹉跎歲月，浪費公帑，二十六公里高鐵使咗近七百億元仲話唔夠，最後埋單計數，隨時成千億都似，講起都難以置信。計功夫茶話齋，港產官僚洗腳唔抹腳，與其任得佢哋浪費，不如開倉派錢，還富於民好過！