郵輪碼頭十宗罪 天殘地缺真丟架

俗語話,慢工出細貨,而港產官僚就啱啱相反,慢工往往出劣貨。大型基建拖拖拉拉,蹉跎歲月,本來已經執輸過人,而且仲要問題多多,甩甩漏漏,你話點同人競爭吖?

嗱,啟德郵輪碼頭就係呢種劣等貨色嘞。呢個耗資八十億元興建嘅所謂旅遊新地標,啟用將近一年,到底吸引咗幾多遊客唔知,但趕客醜聞就有目共睹,簡直丟架。即係咁,郵輪碼頭甩甩漏漏,已曝光嘅問題只係冰山一角咋,本報記者日前實地視察,至少搵出「十宗罪」,簡直令人嘆為觀止。

第一宗罪係施工緩慢。碼頭首個泊位舊年六月開放,至今接近一年,但唔少設施居然仲未完工,搞到部分升降機及扶手電梯未能開放,成個碼頭好似大地盤咁,到處搭滿竹棚,塵土飛揚,既影響旅客,亦有礙觀瞻。

第二宗罪係園景醜陋。碼頭嘅其中一個賣點係空中花園,本來花園中央有個荷花池,如果打理得宜,的確可以令環境生色不少,可惜吖,池中植物缺乏打理,凋零枯萎,好似碼頭一樣死氣沉沉。而園內唔少花圃亦未完成種植,只見一堆堆泥土篤眼篤鼻,直情係當局爛泥扶唔上壁嘅寫照喇。

嗱,由於篇幅所限,無謂再詳細數落去嘞,簡單嚟講,碼頭仲未引入餐廳商店、仲未完善交通接駁、仲未提供Wi-Fi服務、仲未清理通道雜物、仲未維修有危險嘅設施……一句講晒,乜都未準備好。

所以話,港產官僚食嘢唔做嘢,做嘢打爛嘢,碼頭已經啟用咁耐,仲有咁多烏龍嘢,問你服未。正所謂,逆水行舟,不進則退。香港面對周邊地區激烈競爭,旅遊設施早已相形見絀,如果當局繼續不思進取胡混度日,郵輪碼頭仲係甩甩漏漏失禮旅客,本港旅遊業遲早玩完嘅咋。呢,早前唯一以本港作母港嘅國際郵輪「處女星號」拒絕停泊啟德,咪就係因為郵輪碼頭天殘地缺,設施甩漏囉。

講真,一年流流長,郵輪碼頭依然千瘡百孔,反映官僚怠職,根本無心做事。難怪有人話,香港公務員回歸前被人稱讚效率一流,而今日能夠堪稱一流嘅就只有公務員嘅薪酬福利,至於施政效率咯喎,早就淪為三流貨色咯。講開又講,基建工程慢工出劣貨,唔止郵輪碼頭,高鐵就係另一個例子,開工慢過人,完工遲過人,造價貴過人,連醜聞都多過人。咁搞法,香港想唔沉淪都難喇。

左三年,右三年,馬尼拉人質事件經過三年零八個月抗爭,終於得到解決,唔知郵輪碼頭使唔使再等三年零八個月,先至似樣啲呢?