問大家一個問題︰食肆客似雲來，日日做到停唔到手，係咪好消息呢？你可能會話，仲使問嘅，開舖頭梗係想客似雲來啦。之但係咁，如果食肆本來只可以招呼一百人，結果嚟咗一千人，咁就分分鐘好事變壞事嘞。
呢，香港就好似呢間食肆咁，旅客就多喇，可惜配套設施跟唔上，結果咪搞到七國咁亂，弄巧反拙囉。就以啟德郵輪碼頭嚟講，由於設施缺乏，接駁巴士不足，又冇的士入，旅客搭車居然要苦等四粒鐘，你話係咪不可思議吖？
郵輪碼頭嘅亂象只係冰山一角咋。演出業協會就本港演唱會場地做咗項調查，近八成受訪旅客表示有興趣嚟香港睇演唱會，近九成表示香港係其中一個最鍾意嘅演唱會城市添。本來呢，香港咁受旅客歡迎係好事，弊在本港表演場地不足，咁就失禮喇。正如該會話齋，本港現時最大場館只可容納一萬四千人，遠遠比唔上台北、首爾同新加坡等周邊城市，建議當局興建一個可容納三萬五千人嘅室內場館。
其實唔使講到新加坡咁遠，一海之隔嘅澳門都贏香港幾條街啦。大家有冇發現近年愈嚟愈少大牌歌手喺香港開Show，反觀澳門威尼斯人等場館就其門如市，吸引唔少本港甚至國際著名歌手。鬼咩，香港數來數去只有一個落成超過三十年嘅紅館似樣啲，其餘場館根本唔適合舉辦大型演唱會，好簡單，如果你係大牌歌手，你都寧願揀澳門開Show喇，係咪！
早喺二○○七年澳門威尼斯人開幕時，本報已經提醒當局要急起直追，千祈咪自恃旅遊底子厚而不思進取，可惜言者諄諄，聽者藐藐，眨吓眼七年嘞，香港仲喺度食老本，場館、旅遊及會展設施完全冇增加，唔怪得業界忍唔住大聲疾呼喇。
一節見則百節知，演唱會場地不足，不過係本港旅遊及會展配套不足嘅一個縮影咋。好似灣仔會展第三期擴建工程咁呀，講咗幾年，依家仲係無影無蹤。港府歎慢板，業界叫苦連天，話由於會展第三期擴建工程一拖再拖，呢幾年已經流失幾十單生意。肥水流向別人田，近年唔少原本喺香港舉辦嘅國際大型展覽，已經移師澳門，問你怕未。
講到本港旅遊配套問題，真係一匹布咁長，酒店房間供不應求亦係一個老問題。一方面酒店客房供應不足，另一方面訪港旅客不斷增加，唔亂至奇喇。港府估計二○一七年訪港旅客將增加至七千萬人次，有議員仲認為港府估細數添，唔使問阿貴，酒店一房難求只會愈來愈嚴重。
「沉舟側畔千帆過，病樹前頭萬木春」，人哋一日千里，香港原地踏步，再咁落去，就算有幾多老本都唔夠食喇！