今時今日，做香港人難，做香港父母更加難，又要搵食，又要養育下一代，連子女讀幼稚園都要望天打卦，頻頻撲撲。呢，早前北區家長為求一個幼稚園學位而不惜排幾個通宵，已經夠誇張喇，點知依家仲淒涼，有批家長居然要上街遊行為子女爭取幼稚園讀書權，真係可憐天下父母心！
係咁嘅，喺天水圍經營廿一年嘅德怡幼稚園，因為不獲業主續租而被迫遷，幾百名學生成為人球，家長徬徨無助，尋日連同學生、教師及支持者約一千人，手持「守護孩子、守護德怡」橫額喺中環遊行集會，要求原址辦學。佢哋仲話，如果訴求不獲接納，周一將會再發起遊行。你話嘞，讀幼稚園都要搞成咁，係咪無奈吖！
講來講去都係錢作怪，今日地產獨大，租金狂升，唔止生意愈來愈難做，連幼稚園亦苦無立錐之地，近年因為捱唔起貴租而被迫遷甚至結業嘅幼稚園一間接一間，德怡不過係冰山一角咋。今次之所以引起咁多人關注，一來因為受影響學生眾多，二來因為爭奪校舍嘅竟然係另一間幼稚園，同行相爭，有你冇我，講起都可悲。
即係咁，同行如敵國，做生意有競爭本來唔出奇，估唔到依家連幼稚園校舍都要爭崩頭，咁就太不可思議喇。正如業界人士話齋，香港幼兒教育一直以市場運作嘅模式，價高者得，長期面對波動嘅經濟周期及社會不穩定因素，除咗影響持續發展，亦影響教師、家長及學生。尤其係近年樓市狂漲，唔少幼稚園被迫喺商場開辦，地方狹窄，既不利幼兒發展，亦經常因為業主瘋狂加租而被迫關門。
歸根究柢，幼兒教育亂象叢生，政府實在難辭其咎。當局一直闊佬懶理，任由幼稚園自生自滅，表面上不干預市場運作，實際上係推卸責任。冇錯，好多私營幼稚園係牟利性質，政府好難插手，但幼稚園始終同教育有關，當局點可以袖手旁觀，坐視學生成為人球呢？難為當年貪曾政府仲吹水要發展教育產業添，真係笑死人，依家連幼稚園教育都搞到一鑊泡，又何來教育產業吖！
正所謂，十年樹木，百年樹人，如果當局盡快落實十五年免費教育，將幼兒教育正規化，好多問題自然迎刃而解，根本唔會搞出咁多事。唔怕唔識貨，最怕貨比貨，澳門政府坐言起行，十五年免費教育話推行就推行，而香港政府就拖拖拉拉，猶豫不決，都唔知究竟搞邊科。教育官僚都識得話喇，推行十五年免費教育，同推行學券制使費相差無幾，既然係咁，仲等乜嘢吖！