「化腐朽為神奇」大家聽得多，「化神奇為腐朽」又見過未吖？唔係講笑，港產官僚食嘢唔做嘢，做嘢打爛嘢，佢哋真係有本事化神奇為腐朽。
就講前朝貪曾政府敲鑼打鼓成立嘅盛事基金吖，目的係推動盛事，吸引旅客，可惜官僚眼高手低，審批兒戲，監管求其，結果搞到烏煙瘴氣，好事變壞事，盛事變醜事。審計報告踢爆盛事基金管理混亂，帳目不清，問題愈揭愈大，亂象愈揭愈多。有政黨日前帶埋「燒豬肉」去廉政公署請願，諷刺盛事基金變成「分豬肉」嘅平台，尤其係基金資助嘅香港龍獅節，更涉及多項違規，促請廉署介入調查。
冇錯嘞，香港龍獅節多次獲得盛事基金資助，但帳目就唔清唔楚，連單據都唔齊，而且冇申報向兩個關連組織採購，有利益衝突之嫌，真係有必要查一查。最離譜嘅係，龍獅節主辦單位聲稱今年活動可創造三千一百幾個有薪職位，而審計報告就揭發，當中最少四百幾人從小學及幼稚園招募，唔止有造數之嫌，如果呢班小童收取車馬費等報酬，仲可能違反勞工處指引添。任何人非法僱用兒童，一經定罪，最高可被判罰款五萬元，唔係講笑o架。
呢嗱，連身兼龍獅節籌備委員會召集人嘅立法會議員陳鑑林亦承認「造數」，聲稱咁做某程度係為咗符合當局要求喎。佢仲話，舉辦龍獅節係為香港旅遊業創造新品牌，而唔係創造就業，至於活動開支未能提供單據佐證，係因為有團體派出十隻「獅子」，如果要逐隻簽收，好難做到喎。
咁就好笑喇，當年當局成立盛事基金，信誓旦旦話可以創造就業，家陣又話唔係創造就業，咁究竟為乜呢？至於講到創造旅遊業新品牌，更加得啖笑，盛事基金五年來共資助廿四項活動，撥款九千七百萬元，結果就算計埋水分，亦只能提供約一萬個臨時職位，吸引九十萬人參加，你話有冇效益吖？旅遊業新品牌又喺邊度吖？
旅遊事務專員容偉雄聲稱，日後會考慮係咪由會計人員核數，亦會要求獲資助嘅機構保留收據喎。所以話，港產官僚永遠後知後覺，依家至識得嚟補鑊，遲唔遲啲吖！
難為審計署仲苦口婆心，促請港府檢討同改善基金運作。其實，多隻香爐多隻鬼，旅遊事務署敷衍塞責，盛事基金千瘡百孔，已經無藥可救嘅啦，與其嘥時間檢討，不如速速摺埋，慳番啲公帑仲好喇。再講吖，近年旅客愈來愈多，已經逼爆香港，搞到有人要「驅蝗」，當局再花公帑去推介旅遊，豈不是添煩添亂？