C朗鋪定路闖娛圈
【記者Billy馬德里現場直擊】葡萄牙巨星C朗準備由球場扭入大螢幕，透露將來掛靴之後，可能會轉行進軍演藝界！呢位皇馬射手喺NIKE新一輯波砵廣告，更同女友伊蓮娜一齊粉墨登場，拍住上試水溫，為合組情侶檔拍戲鋪路。呢對球壇金童玉女最啱拍「鐵金剛系列」，C朗健碩敏捷身手，似足007占士邦，伊蓮娜性感火辣，自然係「邦女郎」最佳人選！
NIKE呢輯廣告以「RISK EVERYTHING」為主題，卡士強勁，除C朗外，仲有尼馬、朗尼、伊巴謙莫域、夏薩特、派路、碧基、恩尼斯達、馬里奧葛斯、大衞雷斯等球星出場。另外籃球巨星高比拜仁亦有份演出，甚至用CG整出經典英雄人物變形俠醫出場。C朗女友伊蓮娜亦為全球獻吻，真係萬綠叢中一點紅，令人拍爛手掌！
決賽周期間4名保鏢跟身
片中以C朗戲份最多，表情十足，果然交到戲，因此有傳媒問佢退役後，有冇諗過進軍娛樂圈，佢暗示有機會：「我仲未有退休計劃，但任何事都有可能發生，我嘅大門永遠開住。」C朗又靚仔、身材又弗，好有明星相，配合當紅模特兒女友伊蓮娜，人氣爆晒燈，相信票房一定有保證。
另外，葡萄牙足總將於世界盃舉行期間，安排6名保安人員保護球隊，其中4人負責照顧C朗，似乎有大細超之嫌。