生亦難時死亦難 港府無能天下知

港府施政一團糟,搞到港人生無立錐之地,死無安息之所,連搵個骨灰龕位都難過登天,真係講起都一殼眼淚。不過凡事唔係絕對嘅,港府無能都唔係一無是處,起碼刺激咗本港導演嘅創意,將龕位難求嘅苦況拍成短片,仲會喺六月一個國際展覽公諸於眾添。

兩年一度嘅威尼斯國際建築雙年展六月舉行,全球嘅傑出建築作品都會雲集水鄉威尼斯,香港亦有幸參與,其中一件展品更加破天荒將建築融入短片之中,以電影形式呈現。該片導演話喎,有感港人嘅居住空間唔止愈來愈細,樓價仲愈來愈貴,甚至連死後搵個骨灰龕位,冇幾十萬元都難以成事,簡直匪夷所思。佢目睹基層長者嘅徬徨,卻不見社會各界正視呢個問題,所以決定將香港嘅荒謬情況拍成短片,公告全世界,促使港府反思同正視問題。

即係咁,生老病死係人生必經階段,偏偏喺香港,生亦難,死亦難。一方面,樓價居高難下,無殼蝸牛望樓興嘆;一方面,陰宅供不應求,有錢都未必有位。好似短片主角咁吖,本身住喺板間房,經濟能力非常有限,想為亡父搵個骨灰龕位又唔夠錢,將骨灰放喺家中又引來太太不滿,結果搞到家嘈屋閉,你話係幾咁可悲。

其實骨灰龕位供不應求已經唔係今時今日嘅事,弊在歷屆港府一直視若無睹,關人個關,終於搞到非法骨灰龕多如雨後春筍,亂象叢生。前朝貪曾政府好口響咁話要喺十八區興建骨灰龕,結果得個講字,無晒下文,骨灰龕亂象唔止無法解決,仲亂上加亂,現屆政府話就話撥亂反正,可惜問題積重難返。

食物及衞生局局長高永文日前話喎,將於本季內引入規管私營骨灰龕法例,取締及規範私營骨灰龕,佢仲話政府正陸續就各區興建公營龕位嘅選址進行諮詢,如果順利,預計十年後可以推出大量公營龕位。問題係,骨灰龕位每年需求多達四萬個,但公營龕位供應少之又少,就算十年後可以推出大量公營龕位,遠水難救近火,唔通要香港人呢十年唔好死住,等到有龕位先好死咩!供應不足又要取締非法骨灰龕場,大量先人被迫遷但冇地方安置,唔通流浪街頭咩,陰功!

正所謂好事不出門,醜事傳千里。香港自詡國際大都會,連骨灰龕咁小事都搞唔掂,你話醜唔醜吖。仲有房屋、教育、醫療……港府冇一瓣唔係搞到亂七八糟。香港創意產業多得無能港府帶挈,肯定有大把題材發揮,話唔定下次贏埋國際獎項添,咁港府就名副其實「揚威國際」嘞!