夏天遊客特別多，無他嘅，學生哥放暑假吖嘛，一係家長同遊親子樂，一係聯群結隊自由行。所以咯喎，每逢我愛夏日長嘅暑假都係香港旅遊旺季。
之但係咁，本地通街都係黑店，多到梗有一間喺左近，外來遊客人生路不熟，一個唔覺意就會淪為待宰羊牯。千祈唔好以為功夫茶危言聳聽，等本報記者帶大家去一趟「黑店宰客遊」。
外幣找換店係其中一個羊牯重災區，來自深圳嘅汪女士就有過一次恐怖經歷，找換店明明話「一百元人民幣換一百二十四港元」，汪女士交出二萬四千元人民幣，理論上應得二萬九千幾港元。哈，死得佢吖，黑店居然只係遞上二萬六千幾港元，三千元差價就咁吞鬼咗。好彩汪女士識得報警求助咋，對方反芻回吐三千元，否則劏到一頸血呀。
另一個羊牯重災區係俗稱女人街嘅旺角通菜街，當地排檔部分冇標明售價，買賣交易靠把口講價。如果你操流利廣東話當然甚少被騙啦，之但係鄉音濃重或者用外語溝通嘅遊客就同人唔同命嘞，一般會被吊高嚟賣。本報記者陪同美國來港留學生Alex做過測試，購買同一件物品，記者只係被索價五十九元，留學生就被索價七十九元，相差三十幾個巴仙呀，冇陰功！
若然去到新界，大眾踩單車郊野上，良朋共享身心舒暢，外國人都會被視作任意宰割嘅羊牯。大埔同大圍有部分出租單車店，價目因人而異，本地人收費五十元，外國人收費六十元。喂，十蚊雞聽落去好似濕濕碎，之但係講緊嘅差額係兩成呀，你都咪話唔離譜！
計功夫茶話齋，黑店宰客根本係飲鴆止渴，遲早自毀長城玩死自己。你知啦，遊客唔係傻o架，今次畀你呃到四腳朝天，下次就會拒絕重遊舊地，而且好大機會回到老家唱衰香港，購物天堂話唔定會被描繪成呃錢地獄。香港有好多人靠旅遊業開飯，早兩年出現惡導遊阿珍強迫購物已經趕走唔少客仔啦，若然再加上黑店宰客成風，搞到人人怕怕視香港為畏途，旅遊業拍烏蠅點算呀？
一方面固然要大小商舖自律啦，另一方面咯喎，執法者亦都有必要加強監管，例如警方多啲放蛇巡查，黑店見一間冚一間，冚到趕盡殺絕為止。
消費者委員會統計顯示，近三年遊客投訴數字按年上升，去年較一○年增加近一成半，有二千三百四十二宗，今年截至六月都有一千零四十一宗。遊客投訴多咗，反映被劏情況嚴重，假如業界唔自律，若然警方唔執法，旅遊業作為經濟支柱遲早土崩瓦解o架咋！