醫生能醫不自醫唔出奇，消防員未救火先灼傷你聽過未吖？唔係講笑o架，消防處烏龍百出，累人累物，經常攞消防員條命較飛，灼傷係小兒科咋。
話說當年有消防員救火時遇到「閃燃」不幸殉職，消防處隨即更新設備，將消防外套升級至可抵禦攝氏一千度高溫嘅「黃金戰衣」，本來以為萬無一失o架喇，點知近日相繼有消防員喺參加攝氏六百度嘅「閃燃」環境訓練時中招，有人手背竟被灼至二級燒傷。點解會咁？原來又係消防處買錯貨惹禍，該處早前購入二千五百對新抗火手套，價錢貴過舊手套一倍，但抗火能力竟然低過舊手套，搞到最後都要用番舊手套，認真荒謬。正如立法會議員話齋，消防處冇吸取教訓，大批買入裝備後至發現唔啱用，簡直係浪費公帑。
講到入錯貨浪費公帑，都唔係第一次o架喇。消防處○八年斥資七千幾萬元向法國訂購十七架油壓升降台消防車，收貨後至發現新車射水無力，又容易爆喉，得物無所用。以前嘅人就話隔山買牛啫，點知消防處竟然隔山買車，結果做咗水魚浪費公帑不特止，仲影響埋救援工作添，你話係咪累人累物吖。
其實，消防處擺烏龍事小，公眾安全事大，購買消防車又好，更新救火裝備又好，公帑應使則使，最緊要用得其所，物有所值，否則，隨時救人不成反害人，咁就大鑊喇。呢，四年前旺角嘉禾大廈發生五級大火，造成四死五十幾傷慘劇，其中兩名死者係消防員，死因調查發現，無線電通訊設備失效，係導致消防員殉職嘅主要原因。正所謂，「我不殺伯仁，伯仁因我而死」，消防設備落後，等於搵消防員同市民生命安全較飛，唔講得笑o架！
講到消防安全，設備固然重要，工作態度更加緊要。近年本港發生多宗嚴重火災，唔多唔少都同當局監管失職、巡查不力、執法不嚴有關。本報曾踢爆有救護站為迎接長官「查房」，救護員居然變身抹車仔，大做清潔騷，不務正業。講到底，祝融無情，人命關天，任何疏忽職守，麻痹大意，都可能造成嚴重後果，消防處幾時至能夠吸取教訓呢？
古人話齋，「曲突徙薪無恩澤，焦頭爛額為上客。」話說有人建議主人消除火災隱患，主人唔聽，結果有一日真係發生火災，好彩鄰居幫手救火；事後主人請幫手救火嘅人食飯，但就冇請建議佢消除火災隱患嘅人。其實，如果主人當初肯接受建議消除隱患，根本唔會發生火災。呢個故事話畀大家知，防火比救火更加重要呀！