蘭桂坊，一個夜蒲嘅地方，一個情慾嘅地方，一個迷姦嘅地方！
吓？飲食男女夜蒲蘭桂坊大不了尋歡作樂啫，但求一醉或者結伴一睡，點解會出現非自願性迷姦呢一種刑事風化案㗎？實情係咁嘅，老蘭已經變成品流複雜嘅九反之地，不但有本地黑幫操控外籍黑工，負責睇場、講數、收陀地諸如此類，更加有毒販將蘭桂坊視作兵家必爭之地，各式各樣嘅毒品同迷藥源源不絕周圍散貨。你知啦，天下烏鴉一樣黑，世間麻甩盡鹹濕，迷藥最主要嘅作用就係將靚女迷暈，然後上下其手為所欲為，迷姦罪行應運而生。當然不排除仲有另一種慘絕人寰嘅情況，你係死麻甩，你被迷暈了，色魔同樣係一條死麻甩。
迷藥之中最近流行一種俗稱「炸彈」嘅超級迷姦水，藥效特強，無色無味，只須於飲品之中放一滴，受害人已經暈得一陣陣，話咁易就失身。所以咯喎，蘭桂坊興起一句潮語「你今日炸咗未」，反映老蘭作為夜蒲勝地已經毒海沉淪，玩家愈玩愈瘋癲，愈瘋癲愈淫賤。如果你係老蘭之友，功夫茶奉勸三句，第一句係小心，第二句係小心，第三句係記住前兩句。
好嘞，既然蘭桂坊變成又黑又黃嘅罪惡淵藪，尋歡作樂嘅無知少女隨時樂極生悲，淪為衣冠禽獸嘅洩慾工具，咁點算好呢？冇乜點算嘅啫，打擊罪惡萬變不離其宗，四個字講完：差人做嘢！
冇錯嘞，差人真係要做嘢，認真執法，維護治安。警務人員兇神惡煞對付示威者就話唔好啫，出動滅火筒式胡椒噴霧更加犯眾憎，之但係如果兇神惡煞對付不法之徒，令蘭桂坊罪惡絕迹，成為乾乾淨淨、名副其實嘅夜蒲勝地，功夫茶暨全港七百萬市民拍掌歡呼啦！
即係咁，新政府被形容為狼出沒注意，施政作風既狼且辣，其實未必係一件壞事。若然既狼且辣嘅招呼對象係十惡不赦嘅大壞蛋，例如迷姦良家婦女嘅賤精，冇人會反對喎，功夫茶第一個舉腳贊成添啦。
講到呢度，功夫茶諗起一位老蘭常客，就係立法會議員梁國雄。如果長毛見到任何可疑人物利用迷姦水炸女，務必盡好市民責任向警方舉報，港女救得一個得一個吖嘛。若然警方居然疏於職守，冇去勇救迷幻俏佳人，到時咪向警隊一哥曾偉雄示威抗議囉。
講真吖，根據香港大學民意調查，警方民望愈跌愈低，已經跌至回歸以來歷史性新低，家陣滿意度只有百分之五十四點六，比半年前大跌五個百分點，係時候戴罪立功㗎喇。差人做嘢，全力出擊，切勿疏懶，咁咪可以重拾市民對警方嘅尊敬囉！