功夫茶考考大家，中國十大誠信政府之首係邊個？如果你答香港，恭喜你，你嘅歷史知識非常豐富，可惜時事常識就差少少。點解咁講呢？因為香港曾經係中國十大誠信政府之首，好可惜已經係過去式嘅歷史。今時今日最有誠信嘅中國城市係山東省嘅威海，請鼓掌。
好嘞，再考考大家，香港嘅誠信排名由第一位跌到去第幾位呀？關於呢個問題，功夫茶其實都唔識答，事關香港已經十大不入，真係唔知跌咗去邊，話唔定跌咗落坑渠嘅喇。所以話啫，一人得道，雞犬升天，一人折墮，闔家蒙羞，貪腐醜聞纏身嘅過氣特首曾蔭權爵士簡直係累人累物累街坊！
中國城市競爭力研究會發表報告，分析國內二百九十七個城市，劃分二十七個分類優勢排名，香港奪得五個榜首，包括中國最具競爭力城市、中國省區最具招商引資競爭力城市、中國最具活力創富城市、中國最高效政府以及中國食品安全最佳城市。之不過咁，喺中國省域綜合競爭力方面，香港僅得九十三點六三分，以一點七五分屈居廣東之後排名第二。競爭力輸畀廣東已經眼冤啦，最令人氣餒嘅係誠信度暴跌，跌到趴街嗰隻。根據委員會會長桂強芳嘅講法，香港由中國誠信政府之首跌至十大不入，原因係過去兩年媒體不斷報道曾蔭權同特區政府嘅負面新聞，弱化咗香港排名。
貪曾嘅醜聞大家耳熟能詳都唔使多講啦，家陣最弊嘅係官場中人一個二個學到壞晒，廉潔奉公呢一個核心價值兼金漆招牌，遲早不保呀冇陰功。前政務司司長許仕仁已經接受廉署調查，最近連消防處都爆出翻版貪曾事件。今年五月下旬，消防處竟然安排退休在即的副消防總長張溢昌，遠赴阿聯酋首都阿布扎比出席國際會議，回港之後冇幾耐就摘下烏紗告別官場。對於一個咁荒謬嘅安排，難怪消防中人感到不滿，狠批處方離譜，完全做唔到員工外訪之後將所得經驗貢獻部門嘅效果，根本就係浪費公帑。
浪費公帑都仲係其次，最令人心寒嘅係一個推測，有人私相授受益自己友，臨退休外訪公幹等於變相遊埠，名為出席國際會議，實則四處吃喝玩樂。講真吖，人一世物一世，活到老玩到老，去阿布扎比見識一下阿拉伯風情確係幾過癮o架！
呢嗱嗱嗱，你話貪曾係咪累到特區官僚個個變晒敗家仔吖？既然最大嗰個都貪威識食，下面嗰班咪有樣學樣囉，廉潔形象同埋庫房財產敗得七零八落。
唔使講咁多，廉署做嘢啦，全部貪官捉去飲咖啡。未到年廿八，官場洗邋遢！