如果交由特區政府代替中央政府負責捍衞中國領土主權，功夫茶相信十個釣魚島都會全部淪陷，黃岩島之類嘅爭議性島嶼唔使旨意收得番。你知啦，捍衞神聖不可侵犯嘅領土必須具備足夠嘅決心同魄力，更加必不可少嘅係知己知彼嘅資訊掌握，可惜特區政府連領土淪陷都未必知，港產官僚後知後覺嘅反應可能係，吓？乜香港有一塊咁嘅官地咩？
最佳例子，荔枝山莊，新界鄉紳非法佔用官地十八年！
喂，十八年流流長，橫跨兩個世紀㗎，如果官老爺知道位於元朗大棠嘅荔枝山莊部分屬於官地，老早就收番啦，除非貪污包庇嘅啫。若然冇涉及黑錢，官地淪陷十八年當然係後知後覺嘅戇居後果。
對於荔枝山莊呢一筆糊塗帳，立法會政府帳目委員會同佢算一算帳。算帳得出結論，帳委會對於發展局以及地政總署，長久以來未能有效履行保護政府土地免被非法佔用，表示強烈不滿及失望。帳委會部分委員希望新任發展局局長麥齊光能夠更重視處理非法霸佔官地嘅違法行為，當發現違規個案時盡快執法，以免令人有不恰當期望。
係呀，假如執法人員長期懶到出汁不執法，真係會令人有不恰當嘅期望㗎。有人可能會有樣學樣，走去生人霸死地都好喎，反正香港樓價貴到飛起，侵佔官地做個山寨王都好吖。
即係咁，家陣太多人有法不依嘞，若然非法霸佔官地嘅野蠻行為冇得到糾正，香港枉稱法治之區啦。霸佔官地出於貪念，曾商勾結又係出於貪念，萬一過氣特首曾蔭權最終逍遙法外，冇因為貪腐醜聞纏身而繩之於法，法治之區隨時墮落到變咗貪腐之都㗎。
另外，審計報告揭露柴灣青年廣場管理營運不善，帳委會認為，民政事務局過分倚賴青年廣場嘅承辦商，未能發揮牽頭作用，深表不滿及失望。帳委會指出，青年廣場啟用一年已錄得業績虧損三千三百二十萬元，大幅高於原來估計嘅五百萬，批評民政事務局未有向立法會匯報，強烈促請財經事務及庫務局局長制訂機制，如果項目預算同實際出現重大差異，必須向財委會匯報。總而言之一句講晒，爛帳皆因爛官僚。
釣魚島淪陷叫做喪權辱國，官地被霸佔即係喪權辱港。麻煩局長麥齊光醒醒定定，唔好重蹈曾蔭權政府嘅覆轍，有必要的話必須宣示主權，否則失官地等於失官威，失官威嘅結果係未來五年將會有板必撞，撞板多過食飯呀！