檢討票價機制 港鐵必須減價

o衣咦,短期之內檢討港鐵票價可加可減機制?係真唔係呀?即使係真嘅,麻煩唔好又係雷聲大雨點小,最終乜都冇!

運輸及房屋局局長張炳良上任以來,第一次出席立法會交通事務委員會會議,佢話喎,預料港鐵票價調整機制將於本年底至明年初完成檢討,正聘用顧問公司全面檢視現時機制,研究是否有必要加入反映港鐵成本、盈利水平、市民負擔能力等等元素,甚至希望以後加入「服務質素」作為票價考慮。

呢嗱嗱嗱,新官上任嘅張局長千祈唔好呃神騙鬼呀,檢討就要認認真真,唔做得學似曾蔭權政府舊時,永遠有姿勢冇實際。你知啦,家陣呢個所謂可加可減機制,根本係呃鬼食豆腐,淨係見到港鐵賺大錢依然不斷加價,幾時見過減價?冇吖嘛,即係只加不減機制囉。港鐵舊年勁賺一百四十七億元,今年六月仍然勢兇夾狼加價百分之五點四,激到全港市民生蝦咁跳。荷包畀人撳住搶已經火滾㗎啦,賊仔居然係一個肥頭耷耳嘅有錢佬,火上加油嬲到震啦。

如果票價機制考慮到港鐵成本、盈利水平、市民負擔能力甚至乎服務質素,功夫茶可以好似生神仙咁樣未卜先知,港鐵必須減價,而且係大幅減價嗰隻。就以服務質素為例,港鐵服務質素真係冇保證o架。安裝月台幕門講咗不知幾多年,東鐵線居然要到二○二○年先至投入服務,仲要等多悠悠八年呀,唔知又有幾多人誤墮路軌當場濺血。

除咗安裝月台幕門拉牛上樹,加設廁所亦係慢過龜爬。港鐵旺角、太子同金鐘站將於二○一五年底前加設洗手間,又加裝十三部連接車站大堂同地面嘅升降機,其餘未有洗手間嘅七個轉線車站,要到二○二○年底先至有。亦即係話,興建廁所咁簡單嘅工程,又唔係打造神舟九號一飛沖天,竟然需要漫長嘅三至八年,咁嘅服務質素冇可能算係高。

港鐵刮盡每一程當然路人皆見,更加抵死嘅係呢一間食錢公司仲要違規經營。港鐵不斷喺鐵路隧道鋪設光纖電纜,出租網絡畀流動電話營辦商,又透過子公司分租光纖網絡同批售頻寬服務畀其他電訊商,每年估計最少賺兩億元外快,不過係違反土地契約嘅。張炳良就話嘞,事件涉及土地契約條款,地政總署正在處理,政府已向港鐵表明,希望對方尊重所有批地要求。

講到呢度,功夫茶衷心希望新人事新作風嘅新政府撥亂反正,事關貪曾治港七年確係亂七八糟。喂,港鐵嘅大股東係特區政府,特區政府嘅大老闆係全港市民,有乜理由官商勾結欺負大老闆先?認真檢討票價機制就啱嘞,就算唔減價都唔可以肆無忌憚加加加!