唔知好嬲定好笑，嫖妓俗啲講句即係叫雞，刁鑽啲嘅講法係光顧性工作者刺激經濟，大家有冇聽過嫖妓原來係「全裸訪談」？呢一種搞笑得嚟又無恥嘅狡辯，相信只有民主黨嘅資深黨徒先至噏得出。
成件事其實好簡單，民主黨總幹事陳家偉背妻偷食。嫖客爆料話見過陳家偉去鳳樓尋歡，本報記者於是走去尖沙咀香檳大廈實地視察。香檳大廈艷名四播，大廈遍布一樓一鳳，如果改名「香艷大廈」應該冇乜邊個會反對。記者等呀等，終於等到一個疑似陳家偉嘅人形物體蒲頭，咁就梗係追過去驗明正身啦。點不知，疑似物體雞咁腳落荒而逃。好彩記者腳骨力有番咁上下，追逐期間仲有餘力隔遠問一句：「你係民主黨陳家偉？」之但係對方居然話：「我唔係陳家偉！」
好不容易一場追逐戰終於塵埃落定，疑似物體眼見插翼難飛走唔甩，惟有垂頭喪氣坐定定，滴住汗接受訪問。佢老哥先承認自己係陳家偉，然後為佢嘅尋花問柳發表一番充滿娛樂性嘅偉論。佢口震震咁話喎：「我係有入去……入去基本上做訪談，我要畀錢o架！」如果真係訪談，點解鳳姐全身赤裸？呢一位訪談專家答得妙不可言，佢話要求鳳姐擺出各種性愛姿勢，目的係提點何謂安全性行為，例如點樣戴避孕袋。
講到呢度，功夫茶要向各位讀者道歉，事關一直冇提點大家何謂安全性閱讀。你知啦，咁搞笑嘅狡辯絕對唔可以食住飯嚟睇，否則隨時噴飯。如果閣下已經噴飯噴到一塌糊塗，咁就真係罪過罪過！
其實唔使解釋啦，解釋等於掩飾，否則陳家偉不必向民主黨辭職兼退黨，而民主黨又二話不說接納，挽留半秒都怕火燒後欄。開講有話，英雄難過美人關，不過對於民主黨徒而言，貼切講法應該係，白鴿難過鳳姐關。大家仲記唔記得同一個黨曾經出現過另一個嫖客？咁啱大寶號又有個「偉」字，兩個偉哥先後斷正。○四年喎，原屬民主黨中委嘅觀塘區議員何偉途，爆出內地嫖妓被捕嘅醜聞。呢位偉哥一號事後亦係砌詞狡辯，乜嘢插贓嫁禍呀，乜嘢政治迫害呀，總之噏得出就噏，唯一唔同嘅係佢嘅創意冇偉哥二號陳家偉咁澎湃。
嫖妓就嫖妓，衰咗就衰咗，點解要衰得咁奸狡？莫非鬼話連篇真係政治從業員必不可少嘅特殊技能？偉哥一號同偉哥二號相繼出醜，假如仲有偉哥三號，功夫茶代選民向民主黨許一個願，衰還衰，政客切戒衰得奸！