講粗口呢家嘢，大多數情況係唔啱嘅，除非你爆粗嘅對象係極之令人討厭嘅物體。譬如話，菲律賓槍手屠殺香港旅行團偏偏遇上特蠢部隊笨手笨腳救人，港人同胞爆粗爆得理直氣壯，包括功夫茶在內當日都問候過嗰一位陰陰笑三世祖。
當然啦，講粗口始終係不禮貌行為，大家都係少講為妙。之不過咁，有一單考生爆粗事件演變成疑似老屈個案，負責多個公開考試嘅考試及評核局又涉嫌濫權徇私，毫無法理依據之下懲罰考生，咁就大有商榷餘地。不如咁啦，等功夫茶略略介紹一下到底發生乜事幹。
今年四月，一名參加高考嘅中七男生應考企業概論科，做第一部分試卷之時，將未用答題簿放座椅下面，一名男監考員干涉。當佢再做第二份試卷嘅時候，將未用答題簿改放座椅下面書包之上，再被同一人干涉。跟住落嚟，監考員又認為考生書包未拉好拉鏈，有機會偷睇到筆記，雙方發生爭執。監考員覺得有必要撰寫試場異常報告呈交考評局，並且要求考生簽署作實。考生離開試場之後爆粗。
好嘞，爆粗確實係唔啱，不過人哋都係考完試之後先至宣洩不滿啫，有冇必要出動霹靂無敵鐵拳嚴打呢？考評局嘅處理手法係咁嘅，佢哋話根據報告，考生係「試場爆粗辱罵監考員」，所以必須將成績降一級作為懲罰，考生原本考到Ｂ，一降就降到Ｃ。至於整體成績，本來係一Ｂ三Ｃ，家陣變咗四條Ｃ，聲稱慘遭老屈嘅考生擔心難以升讀大學。
何謂老屈？即係咁，考生堅持報告之中所謂「試場爆粗辱罵監考員」係未經佢本人同意之下事後擅自加料，有違專業操守以及道德信義，更加有違法之嫌。
計功夫茶話齋，假如考生真係考完試之後喺試場外面爆粗，而且唔係兜口兜面針對任何特定對象，考評局嘅處理手法就非常之有問題嘞。呢種行為極其量只係情緒失控啫，又冇影響其他考生，點解要罰得咁重手？喂，成績由Ｂ降到Ｃ隨時影響一生，萬一真係讀唔到大學，跟住又搵唔到工作，買樓娶老婆當然唔使奢望啦，容乜易終其一生鬱鬱不得志o架！
法律界人士黃國桐講得啱呀，監考員涉嫌喺已簽名作實嘅報告之中擅自加料，呈交當局煮死考生，涉及刑事罪行，建議考生除咗向考評局上訴之外，亦可考慮報警。
唉，考評局理論上係主持公道嘅正義朋友，點不知喺呢一單考生爆粗事件之中涉嫌濫權徇私，你話係幾咁眼冤吖。唔該考評局主席吳克儉再去主持一下公道，小心考評局信譽破產呀！