一飛沖天嘅民航客機理論上係全世界最安全嘅交通工具，即使遇到南韓傻兵誤以為北韓戰機越境來犯而亂槍掃射，亦未必會有絲毫損傷，之不過咁，萬一大吉利是發生空難，後果真係不堪設想㗎。一係唔出事，出事大大鑊，既然係咁，民航客機嘅事故通報機制係咪應該嚴謹少少？
根據《一九九五年飛航（香港）令》強制性事故報告制度，航空公司或機長、飛機維修公司或人員等等，須就航機事故於九十六小時內向民航處書面呈報。本報記者要求民航處提供資料啦，結果嚇咗一跳。由○九年至今年四月，涉及強制性事故報告嘅個案總共有一千三百四十六宗，當中比較引人關注嘅機身系統、發動機及航空電子系統損壞或故障等等，竟然有四百九十七宗，佔總數三成七。
單係去年已經有六百四十二宗必須強制性呈報嘅航空事故，平均一日接近兩宗，你都咪話唔得人驚。不過當中有一個問題值得大家深思，航空公司係就係要向民航處強制性報告，可惜民航處完全冇必要向小市民交代。換句說話嚟講，民航處一直秘而不宣，從來冇向公眾發放相關資料！
喂喂喂，小市民搭飛機有權選擇㗎，如果某間航空公司特別多事故，寧願貴少少都去幫襯另一間啦，除非壽星公吊頸嫌命長嘅啫。民航處乜鬼都唔講，你叫小市民點揀呀？本報記者嘗試向各大航空公司索取相關事故數據啦，死得佢吖，一個二個以民航處作為擋箭牌，佢哋話喎，一切都已經向民航處通報嘞，要問就問民航處。
中文大學航空政策研究中心副主任羅祥國認為，民航處有責任主動公布事故調查結果以及航空公司嘅改善進度。立法會議員王國興就話嘞，當局應檢討公布航空事故嘅機制，由市民自行決定是否選乘某航空公司，迫使航空公司改善服務。
計功夫茶話齋，民航處咁嘅辦事作風絕對不合時宜，今時今日乜都講求透明度，關乎公眾利益嘅航空事故有乜可能死冚爛冚？前民航處處長林光宇話喎，涉及飛機嘅問題複雜，部分故障不會引起即時危險，公布出嚟反而會弄巧反拙，引起不必要恐慌。
呢啲咪就係官腔囉，硬係以為平民百姓個個都係白癡，只有高高在上嘅官老爺先至明辨是非。打個譬喻吖，涉及沙士嘅問題都好複雜㗎，衞生部門係咪應該隱瞞疫情避免引起不必要恐慌呀？咪玩啦，你試下隱瞞吖，十個人頭都唔夠落地！
好心民航處唔好咁迂腐，黑箱作業過時喇，航空事故玩神秘等於自招民怨，冇好下場㗎！