教育制度變來變去，終於變到所有學生哥有必要修讀通識。即將全面被列為必修科嘅通識教育到底係乜乜東東芫荽葱？顧名思義，通通要識，即係範圍非常之咁廣泛，可能就係因為咁嘅原因啩，所以有部分學生選擇補習。
有一個叫做「青年區動」嘅組織做過一項調查，結果顯示補習通識科嘅心態同傳統補習心態差不多，無非希望更加容易應付考試。之不過咁，通識教育嘅原意本來係要培訓終身學習以及獨立思考，過度考試導向係咪同教學理念背道而馳呢？仲有一點令人相當擔心，調查顯示高中生認為通識科考試比較重視背誦，咁就同獨立思考相距十萬八千里嘞！
學生走去補習或者背誦通識科答案，雖然都未符理想，不過功夫茶更加擔心嘅係另一樣嘢。呢嗱嗱嗱，不妨睇睇冇耐之前另一項調查。教育學院以問卷形式訪問全港接近八百名通識科教師，發現呢一班人之患居然對於人權以及法治嘅觀念十分薄弱。譬如話，超過三成受訪教師認為政府可以隨意解釋法律，以彈性手法解決迫切問題。又譬如話，近半數認為法官審案應該考慮公眾意見。再譬如話，兩成人認為審判重要案件之時應該跟從行政機構意見。再再譬如話，近四成認同執法部門可以利用非法手段蒐集證據，警方亦可以嚴刑逼供。
嘩嘩嘩！睇完咁得人驚嘅調查，相信為人父母嘅你不期然會產生一個心願，千祈唔好畀自己嘅心肝寶貝遇到人權法治觀念咁薄弱嘅通識科教師，否則教壞細路都唔知點算好。負責調查嘅公民研究中心副總監梁恩榮直言：「結果令人震驚，因為問卷條文都係普世核心價值，應有九成人支持。」梁恩榮批評政府一直忽視人權教育，調查發現多達四成通識科教師表示人權知識不足以教學生，擔心長此下去會令人權同法治等等香港核心價值慢慢失色。
通識通識，通通唔識，呢一個絕對係香港教育界一大隱患。如果教師自己都係戇居居乜鬼都唔識，試問又點樣教得好學生？若然教到下一代以為警方嚴刑逼供係可以接受嘅，咁就大大鑊嘞，香港隨時淪為一個無法無天嘅獨裁社會。
以最近鬧得滿城風雨嘅立法會替補機制為例吖，激嬲全人類唔在講，連前高官王永平都睇唔過眼狠批，形容成件事係「全世界最佳通識科反面教材」。萬一通識科教師居然唔知替補機制係幾咁荒謬，誤導學生以為政府粗暴立法係「正面教材」，功夫茶話畀大家聽，香港遲早玩完！