開講有話，對症下藥。醫生齋睇病唔開藥固然攞嚟搞，但如果藥石亂投仲牙煙，醫唔到病不特止，仲隨時攞命添。咁荒謬嘅事居然發生喺本港，真係講都冇人信。
今時今日幫襯公立醫院，隨時做咗白老鼠都唔知。呢，公院常用嘅抗生素「青霉素鈉」供應斷咗纜成年，呢隻由本地老字號藥廠「環球製藥」代理嘅「古老」抗生素，原廠已經停產，外國好多藥廠亦唔再生產。估唔到醫管局居然玩偷龍轉鳳，搵咗隻內地生產嘅抗生素代替，而且一替就替到依家。本來呢，只要藥品療效相同，質量有保障，用邊隻藥都冇所謂，弊就弊在呢隻哈爾濱生產嘅藥喺香港冇註冊，你話唔驚就假。
根據現行法例，醫管局要喺每批病人使用呢種藥前，逐次向衞生署申請，署方舊年共接獲醫局五十四宗有關申請，都幾可觀㗎。問題係，內地近年假藥醜聞不斷，搞出人命嘅個案不知凡幾，呢隻藥喺本港冇註冊，當局點保障病人安全呢？
衞生署話喎，註冊醫生為個別病人提供治療嗰陣，可以輸入喺本港未註冊嘅藥物，但有關藥物要喺外地註冊，醫生要向署方申請並提交資料。咁即係擺明卸膊啫！
醫管局仲離譜，話公立醫院會以「指定病人」嘅形式進口呢隻未喺本港註冊嘅藥物，但唔肯披露有幾多醫院同病人受影響。同樣離譜嘅係，內地生產嘅未註冊抗生素依家仲用緊，但係呢隻藥究竟符合乜嘢國際標準，衞生署同醫管局都答唔出。
使用有關藥物嘅伊利沙伯醫院回應更得人驚，話醫院藥劑部會記錄所有獲處方呢隻藥嘅病人嘅資料，注射前亦會向病人解釋藥物用途同療效。喂，家陣問題係呢隻藥冇註冊，存在安全隱憂，等到注射之後出事至去查，遲唔遲啲吖！
說話可以亂講，藥唔可以亂用。使用未註冊藥物後果可大可小，正如港大感染及傳染病中心總監何栢良話齋，使用未有足夠臨床數據證明療效、喺本港又未註冊嘅藥物係「鋌而走險」，醫管局冇理由因為藥物供應出現問題而咁做。
係咯，醫管局咁做唔只係鋌而走險，直情係收買人命。話時話，病人冇藥可用已經不可接受，當局喺質素及安全冇保障情況下引入未註冊藥物，而且長時間使用，簡直係不負責任。藥物供應亂晒大龍，除咗暴露當局監管漏洞多多，更反映成個藥物機制出咗問題，證明呢班醫療衞生庸官已經無藥可救。
計功夫茶話齋，既然當局咁把炮，未註冊藥都夠膽畀病人用，衞生署同醫管局班高官不如身先士卒，帶頭使用呀，笨！