功夫茶忽然有一個願望，話唔定大埔林村許願樹可以江湖救急幫幫手。乜嘢願望呢？就係用最短時間盡快遊歷本土十大勝景，以及大大小小風味獨特嘅鄉郊野地，事關香港好危險，唔知邊年邊月邊日會霎時之間乜都冇晒。
唔好以為杞人憂天，勝景變爛地嘅慘痛教訓歷歷在目。冇耐前之嘛，譽為香港後花園嘅西貢居然有人企圖將大浪西灣私有化，大興土木破壞生態環境。幾經辛苦發揮群眾力量終於叫做喝停咗，吖，唔得佢死，西貢白腊又有類似悲劇發生。
環保團體踢爆，素有「香港馬爾代夫」之稱嘅西貢白腊雖然已經被納入發展審批地區圖，名義上受到政府規管，之但係當地一直有大型工程進行，泥土被挖成深坑，失驚無神多咗個人工池塘，對上溪流亦搭建咗水管同埋水壩。本報記者走去實地視察，發覺白腊村的確有好多加工痕迹，村內仲有挖泥車以及工程車。白腊明明係一個風光如畫嘅郊遊好去處，不知幾多行山之友視為人間天堂，居然有人出動挖泥車左挖挖右挖挖，大殺風景！
所以話啫，靠呢一個壞腦政府保育生態，同緣木求魚冇乜分別。環保團體係咁講嘅，白腊事件反映保育鄉郊政策漏洞處處，擔心更多具有生態價值嘅地點成為大浪西灣翻版。
西貢之友保育主任黃鳴介紹，白腊臨近地質公園，可觀賞著名嘅六角柱石，亦係首次發現過境遷徙火斑鳩以及橙胸姬鶲嘅地點。可惜吖，功夫茶開始懷疑環境局局長邱騰華患上「後天性發雞盲症候群」，硬係對於接二連三嘅破壞行為視而不見。好似上次大浪西灣出事咁吖，邱局長先係一頭霧水唔知發生乜嘢事，經過傳媒揭發之後，佢老人家居然連大浪西灣嘅具體地點都矇查查。如果唔係發雞盲，白腊又點會淪落到如斯田地？
規劃署話喎，本年初接獲漁護署轉介及公眾投訴，經搜集證據後，已向有關人士發出強制執行通知書，限令終止違例發展。署方發言人又話，將於日內發出恢復原狀通知書。
計功夫茶話齋，一如最近鬧得滿城風雨嘅僭建風暴，一紙公文係冇用嘅，唔知幾多惡霸完全當清拆令冇到。規劃署發出通知書要求恢復原狀，有冇辦法保護到危危乎嘅生態環境？不如咁講，挖泥車係侵略地球嘅怪獸，紙紮超人一定冇可能消滅怪獸拯救地球！
唉，好心搵個眼科醫生幫一幫邱騰華，等佢擘大雙眼睇一睇生態環境面臨幾大危機。邱局長如果自問冇力打怪獸，咁就唔該退位讓賢啦！