笑看天下：等你等到肺積塵

有冇咁誇啊？不肖子話：只要等多一年，唔係肺積水而係肺積塵，唔食煙都黑晒。不肖子今趟又唔係講大話喎，原來本港的空氣質素指標自一九八七年訂立以來，竟從未作出任何修訂，即係話政府呃市民二十三年，寬鬆的指標根本無法達到保障公眾健康的目的。政府唔立刻更新空氣質素指標，則所謂「有所下降」乃自欺欺人，完全漠視改善空氣嘅應有之義。

立法會各黨派早幾日一致通過動議，敦促政府跟上時代步伐，速速更新空氣質素指標，殊不知署理環境局局長潘潔答辯時則擺官腔，說了一大堆不合時宜的廢話，甚麼「與市民生活及工商業運作息息相關，港府需要仔細考慮、尋求共識後，才能訂出獲社會接受的新一套空氣指標」。阿姐，政府大大話話已呃咗市民二十三年，天若有情天亦老，人生有幾多個二十三年？阿姐，學詩人「等妳，在雨中」就話浪漫啫，如今卻是「等妳，在懸浮粒子中」，你話幾咁殺風景？

活在香港，小市民愈來愈感辛苦，想呼吸啖新鮮空氣都咁難，雲與清風，已不可能常擁有，要淘汰高排放量的舊式巴士，有難度！重組巴士路線，有困難！環保失敗又係冇牙力？