早前中國軍隊參加莫斯科紅場閱兵，引來不少話題，當中焦點，莫過於中俄關係空前的好，而對於美國，好像自二○一一年秋奧巴馬宣布「重返亞太」以來，原本就十分複雜的中美關係，因短期利益衝突，例如亞投行案例所折射出來的兩國博弈張力，中美兩國添加了緊張因素。
中美俄三角關係，大家都是核大國，講真，邊會咁易郁吓就打仗啊！你估三歲細路仔玩泥沙、玩水戰咩？大家最緊要係「利」字行頭，彼此關係向來不會太壞也不會太好，回顧歷史，亦確實如此。近年來，西方有論者完全失去了方向，一時話「中國崩潰論」，一時話隨着中國嘅全面崛起，中美關係符合「修昔底德陷阱」。
所謂「修昔底德陷阱」，要言之，係古希臘歷史學家修昔底德喺《伯羅奔尼撒戰爭史》中，敍述了新興強國雅典嘅崛起，引起原有霸主斯巴達嘅恐懼，使戰爭不可避免，最終導致兩國衰敗，此種新老強國嘅鬥爭模式後來被概括為「修昔底德陷阱」。之不過，理論終歸係理論，好多嘢係要睇實情及環境。美國的全球霸權已持續了七十年，其後歷經反恐戰爭、金融危機等，其霸權已沒有昔日之氣勢矣！
至於中國，即使崛起，仍然是一個脆弱嘅大國，一大堆改革排住隊等住改善，如區域經濟與城鄉發展不平衡、貧富差距擴大、環境惡化與生態危機、人口老化、社會要維穩等等，是以不可能把主要資源和精力用於向外擴張。當前還在全力反腐敗，打虎拍蠅忙得不亦樂乎，哪有時間挑戰美國嘅直接利益？
依老朽看，未來中國，依然在學習適應能力，堅持自主發展道路，是個求真務實的政黨，他追求的不是速度，是以中俄美三國關係，未來一個時期依然是平衡關係，彼此都會有蜜月期與冷戰期，沒有甚麼好大驚小怪的甚麼「陷阱」。