經過多番拉鋸，國泰航空公司嘅工潮終於因為資方「跪低」而暫告平息，勞方開酒會派紅玫瑰祝捷。不過咁，勞資糾紛已成為國泰家常便飯，幾乎年年都有一兩劑，今次就話搞掂啫，唔知幾時又嚟過，唔好咁快高興吖。
正所謂，物必先腐而後蟲生。作為本港龍頭航空公司，國泰之所以醜聞多多，員工離心離德，服務質素每況愈下，旅客不勝其煩，唯一解釋就係內部管理有問題。
嗱，睇睇呢個例子，就知道國泰管理有幾咁混亂。早排有市民一家三口花費逾十萬元參加印度豪華團，講明乘坐國泰商務客位，本來諗住畀八旬母親好好享受吓商務艙舒適寬敞嘅環境，點知回程時旅行社接獲國泰通知，話因為機票「超賣」，機位爆滿喎，一家三口被迫降級坐特選經濟客位，搞到老人家捱咗六個小時至飛返香港。事後國泰總共賠償五百美元就算數，連機位差額都唔夠，更加唔使講賠償精神損失。
豪華遊換嚟一肚氣，乘興而去敗興而回，旅客唔嬲就假。點知國泰唔止冇認錯，仲死撐話為免浪費機位，一般都會接受超額預定機票，呢個係業界普遍做法喎。照咁講，航空公司點做都得喇，乘客豈不是任人宰割？自己超賣機票，後果就要乘客承受，你話國泰仲有冇商業誠信吖？
正所謂，一件污，兩件穢，今次唔係單一個案，類似事件已經多次發生，有人甚至被迫改搭另一班機添。唔怪得好多市民認為，國泰服務質素愈來愈差，同以前根本冇得比。冇錯嘞，自己知自己事，如果國泰管理層意識到問題所在，積極諗辦法解決，公司運作點會亂七八糟，勞資糾紛又點會不絕如縷吖。
講到國泰管理問題，可以講係沒有最亂，只有更亂。呢，今次勞資雙方達成共識未夠廿四小時，公司機艙服務員總經理就突然被調職，擺明有蠱惑喇。據講原因係咁嘅，呢位機艙服務員總經理當日曾建議開放國泰城體育中心，畀包圍公司總部嘅工會成員避雨，本來係出於好心，結果觸怒咗管理層。換句話講，有人被秋後算帳，成為今次工潮嘅犧牲者，簡直無辜。
講番工潮呢筆，國泰內部管理亂過亂世佳人，工會罷工當食生菜，而且經常選擇長假前發作，搞到乘客無所適從。即係咁，勞資雙方各執一詞，公說公有理，婆說婆有理，外人好難判斷誰是誰非，唯一可以肯定嘅係，如果國泰唔改善內部管理，清除亂象，工潮必定陸續有來。