剛出爐不久的全球競爭力排名榜，香港出乎意料地逆升兩級至第二位，成為僅次於美國的經濟體。有道是：與其抱怨，不如改變；想要改變，必須行動。然而，香港自九七回歸後，至今逾十七年，社會失調、行政立會互不咬弦，施政困難，明明是一個簡單的民生撥款，要通過往往慘過唐三藏去西天取經……
香港從一個經濟城市變成一個永無寧日、社會動盪嘅政治城市，香港仲有運行？也許正如本報「正論」所說的「爛船還有三斤釘」、「由於家底厚」，而實情卻是香港面臨種種隱憂，譬如經濟結構單調、產業空洞化……也只有前朝貪曾才夠膽厚着臉皮高呼：單靠金融業，香港可以養起一千萬人！猶幸當今特首ＣＹ，稍有「自知之明」，還懂得說一句要「居安思危」！
之不過，老朽覺得唔多貼切，應該係「居危思安」，香港面臨政改爭拗、施政空轉，樣樣基建如大白象、中港矛盾、房屋問題、人口老化問題……請問如何思「安」？今時今日，劏房遍地開花，無處不在，無奇不有，豬欄雞寮貨櫃橋底都可變身「劏房」，而輪候公屋的名冊近二十八萬人，「三年上樓」又係大隻講！阿哥，如何居「安」啊？
香港競爭力排名升到第二——咁又點啊？唔通真係月入萬五，唔去東瀛遊，少啲去睇戲；小莫小於水滴，月儲三千，便可變成大海汪洋，買到層螞蟻也嫌難轉身嘅「樓」同阿珍拉埋天窗？若然，天下那麼大，老朽也想拋開一切出去看看，可惜錢包那麼小，六合彩就愛和老朽捉迷藏，我買六，它開七！唉！天意弄人比極權政治更可怕也。
回頭再想想：香港競爭力即使高升至第一，老朽只能推想一個曲線玲瓏浮凸嘅背影，驀然回首，燈火闌珊處，卻是一個嚇死人嘅正面如花！