古人教落︰巧言令色鮮矣仁。呢句說話形容港產官僚就啱喇，香港郵政涉嫌違法滋擾東方報業集團，事件拖咗五個幾月，究竟有乜結果呢？當局話就話已經完成調查，點知廢話連篇，唔止冇交代真相，而且死唔認錯，擺明想不了了之喇。
話說舊年十月三十日，東方報業收到一封於同年八月廿九日寄出、懷疑因地址有誤而被退回嘅公文袋郵件。呢袋曾經被擅自拆閱嘅郵件裏面，竟然藏有另外九封同日投遞嘅郵件，而九封「信中信」之中，有封更被開封後再以膠紙封口。呢九封信明明地址完整，貼足郵資，寄唔出已經唔正常，加上拖咗兩個月至退回，更加匪夷所思。正所謂，不近情者多藏奸，事件疑點重重，你話當中冇蠱惑，三歲細路都唔信喇。
明眼人一睇就知，今次唔係一般郵遞失誤咁簡單，而係擺明玩針對。可能因為做賊心虛啩，香港郵政一直玩拖字訣，話就話進行內部調查，實際上敷衍了事，直至拖無可拖，先至死死氣公布調查結果。最離譜嘅係，調查結果唔係交代真相，而係一味卸責，對於案中嘅疑點，答非所問，甚至避而不談，特別係對於「信中信」嘅疑問，完全冇解釋原因，淨係將個波交畀警方。而警方嘅調查報告一樣求求其其，令人失望，對於嫌疑人身份同動機，統統語焉不詳，愈描愈黑。好明顯，郵政同警方互扯貓尾，真相可能石沉大海，成為另一件無頭公案。
正如學者話齋，今次事件唔係一般案件，而係涉及傳媒機構，香港郵政嘅處理手法令人質疑係打壓新聞自由，一定唔可以草草結案，必須查至水落石出，釋除公眾疑慮。冇錯嘞，香港郵政擺明就係打壓新聞自由，製造寒蟬效應，當事件被踢爆後，又遮遮掩掩，企圖瞞天過海，不了了之。
話時話，如果大家知道港府過去點樣滋擾及迫害正義傳媒，對今次事件就唔會覺得奇怪咯。咁多年來，當局為咗打壓東方報業，簡直係絞盡腦汁，無所不用其極，消防處、警務處、食環署、衞生署、控煙辦、淫審處、平機會等部門充當政治打手，輪流上陣，手段卑鄙，罪名千奇百怪，幾乎連莫須有嘅藉口都出埋，令人嘆為觀止。係呢，今次係香港郵政上陣，下次又輪到邊個部門呢？
唔怪得有人話，愛國愛港冇前途，反中亂港有運行，真係一啲都冇講錯。港產官僚是非不分，倒行逆施，搞到香港烏煙瘴氣、七國咁亂，想唔沉淪都幾難！