旅遊之都屢蒙污 熱情待客方正道

今日係星期日,又係不平靜嘅日子,激進組織揚言要令「光復行動」遍地開花,反水客騷亂會唔會捲土重來,暴力場面會唔會再次出現,真係令人擔心o架。

大家都知喇,反水客行動陰魂不散,除咗搞到每個星期日都不得安寧,更加令香港臭名遠揚,部分內地同胞固然敬而遠之,有啲東南亞旅客亦望而卻步。有見及此,有團體發起親善行動,到北區派發單張,歡迎內地旅客訪港,有人仲身掛「中港一家親」、「香港歡迎你」嘅彩帶添。

正所謂,本是同根生,相煎何太急。港人及內地人同文同種,本來不分彼此,依家搞到矛盾惡化,勢同水火,你話幾無謂呢。其實,莫講話兩地經濟關係愈來愈密切,根本冇可能分開,就講旅遊業吖,更加係本港四大經濟支柱之一,多年來受惠於個人遊,唔止旅遊業興旺,連零售、酒店、餐飲等行業亦得益唔少,甚至帶起整體經濟,如果繼續趕客,只會自己倒米咋。

呢,舊年整體零售銷售額錄得沙士以來首次下跌,已經係一個警號,而今年春節內地客人數亦少咗,導致主題公園等五大旅遊景點入場人次平均跌一到兩成,問你怕未。業界人士形容旅遊業跌勢比預期更快更急,尤其係反水客重災區,商戶更加叫苦連天。有人話香港旅遊及零售等行業已經步入寒冬,一啲都冇誇張。

此地不留人,自有留人處。香港有人將內地客視為蝗蟲,欲驅之而後快,反而其他國家將中國旅客視為「財神」,紛紛打開大門,歡迎都來唔切。淨係今年春節咋,就有五十幾萬中國人到日本旅遊,總消費額估計達到六十億元人民幣,連廁所板都賣到斷貨,帶旺成個日本零售業,全國百貨店銷售額錄得十一個月來首次上升。唔怪得有日本餐館老闆話,如果冇中國旅客,日本旅遊業根本「無法生存」。

仲有吖,英國傳媒預測未來全球郵輪乘客四分三係中國人,可見中國市場潛力巨大。話時話,近水樓台先得月,香港正大力發展郵輪旅遊,仲興建咗全世界最貴之一嘅郵輪碼頭,如果能夠食住中國郵輪市場快速增長嘅勢頭,真係前景無限o架。不過咁,香港想吸引更多郵輪客,自己就要生生性性,除咗要進一步完善相關配套設施,最緊要熱情待人,務求令旅客有賓至如歸嘅感覺。否則,如果繼續任由一小撮激進分子搞事,唔止旅遊業步入寒冬,遲早連郵輪碼頭都拍烏蠅嘅咋!