今時今日嘅香港，做家庭主婦一啲都唔易，除咗衣食住行樣樣難，要食得放心，更要打醒十二分精神o架。
如果問大家，青豆角貴定係新鮮雞貴？好多人可能會話，問嚟都多餘，梗係新鮮雞貴喇。嗱，世事無絕對，答案啱啱相反，青豆角居然貴過新鮮雞。根據菜販所講，青豆角價錢不斷飆升，農曆新年前後，曾經賣到八十元一斤，係半年前嘅三倍，問你驚未！
究竟咩原因？係咁嘅，自從食安中心舊年十一月驗出內地青豆樣本含除害劑「克百威」超標四十四倍之後，供應量驟降，價格翻幾番。最近話就話回落一半，仍然賣四十元一斤，成為最貴蔬菜之一。其他蔬菜亦唔平得去邊，好似通菜、菜心同莧菜咁，分別貴咗五成到一倍不等，你話家庭主婦係咪難做吖。
不過咁，農藥超標影響供應量只係菜價狂升原因之一，檢驗農藥成本大幅增加，係另一個主要因素。《食物內除害劑殘餘規例》舊年八月生效之後，以每車一萬二千五百斤蔬菜計算，最低檢驗成本達一萬八千元，比新例實施前嘅一千元增加十七倍。唔同季節菜價有高有低，唯獨檢驗成本四季同價，一毫子都冇得減，羊毛出在羊身上，呢啲成本梗係轉嫁畀消費者喇。
正所謂，民以食為天，食以安為先，食品安全關乎人命，加強檢驗係應有之義。歸根究柢，如果唔係內地菜農唯利是圖，有關部門監管不力，根本唔會出現呢啲問題。正如內地專家話齋，蔬菜農藥嚴重超標，係因為人民失去道德，官員唔使問責，社會已經進入「互相侵害」嘅年代。
冇錯嘞，內地發展的確好快，但道德沉淪更加快，奸商見錢眼開，乜嘢事都做得出。本報年前曾直擊報道，發現供港菜場集中嘅珠三角地區，唔少菜農使用未分類嘅「垃圾肥」，廢棄電池、舊膠樽、塑膠廢物等等，無奇不有，導致土壤受到污染，重金屬嚴重超標。依家情況有冇改善呢？畫公仔唔使畫出腸，如果有改善，青豆角就唔會驗出含除害劑超標四十四倍喇。
有立法會議員認為，淨係靠香港把關好牙煙，應該同內地加強溝通合作，從源頭檢測做起，確保供港蔬菜安全。講就係咁講，問題係家陣唔止蔬菜靠唔住，內地幾乎無物不假，無食不毒，根本防不勝防。就好似近年揭發嘅孔雀石綠魚、蘇丹紅禽蛋、三聚氰胺毒奶等等，香港邊次唔中招吖？老實講，如果內地同胞唔係對國貨冇信心，都唔會湧來香港掃貨喇。
所以話，要解決水貨問題，首先就要解決產品質量尤其係食物安全問題，否則，唔止家庭主婦唔易做，所有中國人都難做吖！