面係人哋畀，架係自己丟，一啲都冇講錯。嗱，本港加工食品出事，發現問題嘅竟然係澳門，簡直醜死怪。論管治能力、社會穩定、經濟發展以及民生改善，香港瓣瓣都唔夠人揮，家陣連自以為勝人一籌嘅食品安全檢測都衰埋，真係乜架都丟清光咯。
澳門日前發現一批香港入口嘅煙三文魚柳受到李斯特菌污染，要求即時封存並停售。本港食安中心居然仲矇查查，收到對方通報至「跟進」，話會抽取生產商同款產品其他批次樣本作檢測，點知查咗一輪冇發現，反而本港就有幾家大型超市確認有售賣涉事食品，仲話已安排回收同退貨。即係話，一早有市民中招喇。
唔係講玩，專家話，胎兒、初生嬰兒、長者同免疫力較低人士受李斯特菌感染，可能出現嚴重併發症甚至死亡。孕婦感染分分鐘會導致胎兒流產、死胎同早產添。係人都知，高溫可以殺菌，問題係煙三文魚一般都係打開包裝即食，如果受污染，領嘢機會幾乎百分之一百，問你怕未！
更得人驚嘅係，呢款食品唔係內地入口，而係喺香港加工，係地地道道嘅「香港製造」，按道理，應該符合食品衞生標準至可以出口。食安中心居然驗唔出，導致問題食品賣通街並流入澳門，害埋鄰居。呢次如果唔係澳門方面發現問題知會港方，食安中心班老爺可能仲喺度印印腳呀。
即係咁，食安中心將食安當兒戲，後知後覺，賊過興兵，早就有前科嘅嘞。大家仲記得舊年搞到兩岸三地雞毛鴨血嘅強冠坑渠油事件嘛？台灣啱啱爆出醜聞時，港府袖手旁觀，仲抽水扮「受害者」，點知搞嚟搞去，原來香港居然係毒油嘅主要來源地，港產官僚至係毒油氾濫成災嘅「幫兇」。
仲有麥當勞過期肉醜聞，事件喺上海爆發，香港麥當勞一開始死唔認數，食安中心仲幫腔話冇相關食材入口本港，點知畀人踢爆講大話，全港嘩然，食安中心至如夢初醒，話要徹底查清楚，結果搞到形象掃地，誠信蕩然。
諗落真係搞笑，港府話要大力發展檢測認證業，仲要係六大優勢產業之一，弊在港產官僚眼高手低，講就天下無敵，做就有心無力，優勢產業就冇嘞，劣迹斑斑就有份。食安中心班廢柴官僚高薪厚祿，一事無成，食品安全醜聞鑊鑊新鮮鑊鑊甘，簡直係將市民當白老鼠。
既然港產官僚冇心冇肺，連食品被李斯特菌污染都要靠澳門發現，計功夫茶話齋，不如摺埋食安中心，交晒畀澳門檢驗，慳番一大筆公帑唔在講，最緊要港人食得放心吖嘛！