旅業衰過沙士 驅蝗勁過病毒

復活節及清明節長假期本來係傳統旅遊旺季,結果業界唔係報喜,而係報憂,原因係訪港旅客跌跌不休,睇怕五一長假都唔慌好得去邊。飲食業與零售業要聯手推出優惠措施救亡,怎一個慘字了得吖。

嗱,數字唔會呃人,今個假期港人外遊旅行團勁升兩成,但內地訪港旅行團暴跌兩成,連帶東南亞及歐美客量亦減少,搞到唔少酒店要大減價搶客。點解搞成咁?據旅遊業議會總幹事董耀中分析,主因同過去半年嘅反水客示威有關,旅客覺得港人唔友善,人身安全冇保障,梗係過門不入啦。

家陣旅遊業嘅情況仲衰過沙士,咁咪即係話反水客示威嘅趕客效果仲勁過沙士病毒?冇錯嘞,受佔中同埋連串驅蝗行動影響,中港矛盾惡化,去年零售業銷售額已開始掉頭向下,今年首兩個月繼續下跌百分之二,反映旅客消費模式改變,減少消費。入境處仲話,今年頭兩個月訪港旅客數字仍有上升,到咗三月就下跌,內地客更大減一成。復活節假期又係咁跌,你話係咪多得驅蝗、光復鬧劇唔少吖?

旅客望港卻步,各行各業一片愁雲慘霧。餐飲聯業協會會長黃家和係咁講嘅,預計整個四月業界最少損失兩億元,對五一長假嘅市道亦唔敢樂觀,家陣正計劃同零售業界聯手推出優惠救亡,希望港府出面協調。佢仲話,行錯一步,就要花十倍氣力補救,幾咁無奈。零售管理協會更擔心,香港再唔改善趕客形象,下半年嘅市道都唔會好轉,隨時爆發裁員結業潮。

呢啲咪叫做「黑狗偷食,白狗當災」囉,你話班示威人士係咪冇腦吖?歌都有得唱嘞,「莫道你在選擇人,人亦能選擇你」,有錢任性吖嘛,內地旅客有大把選擇,唔通會驚冇地方歡迎佢哋咩。廣東省一項旅遊意向調查亦顯示,未來一年選擇來港嘅受訪者只有一成六,最多人選擇去日韓,肥水流向別人田,最終蒙受損失嘅咪又係香港。

所以話啫,搞事分子以為反水客係替天行道,其實玩死香港咋。好簡單,只要有利可圖,水貨活動始終會存在,示威者趕走嘅反而係真正旅客。咁又係呀,好事不出門,醜事傳千里,示威者見人就鬧,見篋就踢,十足瘋狗咁,莫講話內地旅客怕怕,其他地方嘅旅客都走夾唔抖喇。香港變成趕客之都,冇人嚟幫襯,到時百業蕭條,大家攬住一齊死嘅咋。

講到底,水貨活動擾民自有執法部門對付,示威者對旅客動手動腳,點都講唔通。計功夫茶話齋,香港要脫掉趕客之都嘅帽子,減價救亡仲係其次,最緊要處理嗰班搞事者先喇!