上海迪士尼樂園即將開幕，好多人擔心會同香港搶客。查實香港迪士尼有個獨一無二嘅「景點」，上海根本冇得比。乜嘢景點咁巴閉？之唔係甩皮甩骨嘅病樹囉。
唔係亂噏o架。迪士尼樂園外面嘅神奇道，種咗七十二棵由澳洲運嚟嘅加拿利海棗，原本諗住裝飾門面，綠化環境，點知樹木一直飽受蟲害，部分甚至要被移除。而剩低嘅亦唔好得去邊，唔係樹葉枯黃，就係布滿一點點黑色真菌，有啲更加出現被白蟻侵蝕嘅痕迹添，總之就係爛嘅爛殘嘅殘。負責栽種嘅康文署話喎，起碼有四棵樹因受真菌同細菌感染而要移除。
唔講唔知，原來呢個問題已經持續十年有多。○四年當局為配合迪士尼樂園開幕，斥巨資購買咗一批加拿利海棗，平均一棵值十萬元，當時已經有樹木專家指出，類似樹木內地同台灣都有，價錢平好多，質疑係咪物有所值，結果不幸而言中，未等到樂園開幕，已經有十六棵病死。而相同品種嘅海棗，家陣已經漲價到三十萬元一棵，問你怕未。咁都未算，承辦商搞到一鑊泡，今個月約滿依然獲得續約，康文署所託非人，你話係咪混帳吖！
話時話，康文署種樹亂點鴛鴦，搞到亂象叢生，市民早已見怪不怪。當年喺天水圍栽種八棵大型樟樹，點知因為唔夠地方生長，加上泥土同水分唔配合，結果要連根拔起。最離譜係同一錯誤竟然連犯兩次，補種嘅葉欖仁同樣需要寬闊空間，有專家估計最多只有五、六年壽命，分分鐘又要推倒重來，根本就係浪費公帑。
港產官僚做嘢求求其其，連種樹都烏龍百出，敷衍塞責固然係原因之一，更重要係唔使自己出錢，又點會肉赤吖。好似民航處咁，豪擲十幾億元購入新空管系統，由於驗收馬虎，結果問題多多，延誤咗三年幾仲未啟用，民航官僚唔追究不特止，反而向承辦商追加款項修補系統。消防處一樣咁混帳，入錯貨成為家常便飯，有人計過數，該處過去十年入錯貨涉及嘅公帑近十億元。申訴公署同審計署話就話年年炮轟政府部門管理混亂，浪費公帑，可惜官僚意見接受，態度照舊，唔到你唔服。
所以話，善財難捨，冤枉甘心，港府官僚一方面藉口「審慎理財」，一毛不拔，另一方面洗腳唔抹腳，敗家成性。相對於成個政府嘅浪費，康文署種錯樹只不過係冰山一角嘅咋！