古人話，「季孫之憂，不在顓臾，而在蕭牆之內。」睇吓今時今日嘅香港，就知道古人講得冇錯。十幾年來一直興旺嘅旅遊業，家陣居然面對寒冬，危機重重，咪就係香港自己搞成咁嘅囉。正如「東方報業民意調查」顯示，香港缺乏新景點，加上頻頻上演反水客鬧劇，都成為嚇怕旅客嘅主要因素。
數字唔會呃人，三月份內地訪港團平均每日只得三百多團，較去年同期大減。入境處數字亦顯示，上月訪港旅客按年下跌百分之八點七，當中內地旅客跌幅達一成。
訪港旅客減少，連帶酒店上月入住率亦應聲下跌百分之五，有五星級酒店被迫大減價搶客，講起都幾無奈。
係人都知，旅遊業係本港經濟支柱之一，而內地客更係支柱中嘅支柱，旅客減少造成嘅影響絕對唔講得笑o架。呢，今年首兩個月零售業總銷貨價值合共下跌百分之二，特別係珠寶首飾等奢侈品嘅銷貨價值暴跌近一成六，已經亮起紅燈喇。零售管理協會仲話，對於復活節嘅市道唔敢樂觀，唔排除有店舖結業喎。其實，店舖結業潮早就開始，旺區出現大量吉舖，好似銅鑼灣波斯富街咁吖，有舖位放租近一年都租唔出，問你怕未。
正所謂，事有必至，理有固然。旅遊業之所以搞成咁，皆因港府一味食老本，既唔識得興建新旅遊景點，更唔識得增加購物等配套設施，結果授人以柄，激進組織頻頻發起趕客行動，搞到雞犬不寧，旅客唔走至奇喇。「東方報業民意調查」顯示，四成一受訪者直斥反水客示威嚇怕旅客；兩成六認為旅客消費模式改變；兩成二歸咎於本港缺乏新景點。對於零售業持續不景氣，三成四受訪者擔心前景不明朗，影響香港經濟；兩成九憂慮零售業由盛轉衰，步入寒冬；兩成五認為整體消費氣氛疲弱。
冇錯，內地反貪固然令旅客消費模式改變，但呢個絕對唔係本港旅遊業及零售業步入寒冬嘅主要原因。好簡單，全世界都錄得中國旅客大幅增長，偏偏香港斯人獨憔悴，大家都知道點解喇。唔好講歐美或者日韓咁遠，淨係睇澳門就知，上月訪澳內地旅客增加逾一成，香港簡直相形見絀。
講到底，香港本身問題多多，先至係趕客嘅主要原因。除咗驅蝗鬧劇、景點不足、酒店海鮮價，連名牌貨品都幾乎貴絕全球，試問旅客仲點會願意嚟港消費吖。冇計嘞，政府無能，政客無良，香港自我沉淪，所謂嘅購物天堂早已一去不復返咯！