乜嘢叫做「三個和尚冇水飲」，睇吓港產官僚咪知囉。財政司司長曾俊華喺財政預算案提出引入美食車概念，聽落就幾吸引嘞，可惜吖，根據政府部門推得就推、拖得就拖嘅傳統，美食車幾時至可以面世，連鬍鬚曾都答你唔到。
即係咁，自從預算案提出美食車概念後，坊間反應都幾正面，唔少商販仲躍躍欲試添，點知鬍鬚曾講完就算，冇晒下文。日前佢出席一個墟市活動，被追問美食車嘅進展時話喎，已經邀請旅遊事務署等部門研究，但要考慮衞生及交通等問題，情況比較複雜，未有具體時間表。
喂，搞美食車啫，又唔係推銷政改，究竟有幾複雜呀？研究復研究，諮詢復諮詢，搞得嚟蚊都瞓蛇都死啦。正如有立法會議員話齋，美食車得個講字，根本係「三個和尚冇水飲」嘅典型例子，從牌照到車輛，從製造食物到流動售賣，牽涉多個政府部門，弊在冇一個部門願意負責協調處理，一味將個波拋嚟拋去，又點會有具體時間表吖。
仲有吖，美食車睇嚟好似小本經營，其實一啲都唔小o架。有人參考過台灣經驗，淨係改裝車輛就需要七十萬元，加埋其他經營成本，入場費隨時過百萬元，絕對唔係一般小販及市民能夠負擔，如果當局唔肯提供適當支援，隨時又係財團玩晒。
本來呢，美食車可以為基層市民提供自食其力嘅機會，又可以將本地特色美食發揚光大，搞得好仲可以成為特色旅遊景點，可以講係一舉多得。外國喺呢方面早就有唔少成功經驗，問題係香港地方太細，限制多多，加上港產官僚墨守成規，唔識變通，美食車一味紙上談兵，隨時變成車大炮都似。
講開又講，港府話要發展多元經濟，吹咗十幾年，到依家仲係一事無成，咪就係因為港產官僚冇承擔囉。當年亞洲金融風暴後，當局煞有介事提出「振興本土經濟」，仲喺黃大仙搞過騰龍墟，點知得三分鐘熱度，過後就無聲無息。講到呢度，真係令人唏噓不已，以前上環大笪地熱熱鬧鬧，人流如織，有「平民夜總會」之稱，直到九十年代初，因為政府收地等原因，大笪地先至逐漸式微並消失。○三年沙士後，港府話要振興經濟，曾重辦新上環大笪地，但由於欠缺特色，加上禁止經營熟食，失咗傳統大笪地嘅風味，唔夠一年就慘淡收場。
所以話，官僚靠得住，豬乸會上樹。鬍鬚曾歎咖啡、睇法國電影就叻啫，旨意佢搞美食車拮魚蛋喎，盞嘥氣嘅咋！