「從一粒沙看世界」，係英國詩人威廉布萊克嘅名句，如果將佢改為「從一棵樹看官僚」，咁就更加可以反映港產官僚有幾廢喇。
功夫茶唔係亂講。呢，港府成日將保護樹木掛喺口邊，○四年煞有介事推出《古樹名木冊》，選定五百二十七棵古樹，當時實牙實齒咁話，會有全盤保護古樹嘅措施喎。好嘞，十年後嘅今日，呢批古樹究竟保護成點呢？講起都唔知好笑定好嬲，原來已有七十一棵古樹被靜靜雞剔除，當中唔少係死於俗稱樹癌嘅褐根病，問你怕未！
好似九龍公園咁吖，最少有三棵細葉榕古樹患上褐根病，唔止有倒塌危機，連附近樹木亦受到感染，病菌不斷擴散，再唔醫治嘅話，隨時好似倒骨牌咁一鑊熟。仲有吖，大埔社山村嘅大橡古樹亦被真菌入侵，樹根飽受蟲蛀，樹身出現大洞，而且好似被劏開兩邊咁，搖搖欲墜，點知康文署求其搵個支架頂住棵樹就算，連專家都話難以置信，警告再唔解決真菌褐根問題，幾多個支架都頂唔住嘅咋。
最令人惋惜嘅係，位於維園嘅刺桐古樹已經係全港碩果僅存一棵，結果又係被玩殘。康文署好做唔做，喺樹根旁邊加上枯木裝飾，但又無做防腐及滅蟲措施，卒之搞到古樹飽受蟲蛀及真菌感染，隨時嗚呼哀哉。咁都未算離譜，康文署連基本知識都欠奉，竟然誤將九龍塘一棵象耳豆樹當成合歡樹打理，導致棵樹生滿真菌，睇見都牙煙，當局仲闊佬懶理，直到本報通知，先至派人移除。你話嘞，港產官僚係咪草菅樹命吖？
大家一定仲記得，○八年有位港大女生喺赤柱畀一棵倒冧嘅百年刺桐古樹壓死，當局事後亡羊補牢成立樹木辦，話就話要統籌政府各個部門管理同檢查樹木，點知樹木辦淪為廢柴辦，咁多年來樹照冧，而官員就糧照出。當局經常以人手不足為藉口推卸護樹不力嘅責任，真相又係點呢？有康文署員工踢爆，依家管理樹木嘅員工達到二百幾人，唔係人手不足，而係當局亂點鴛鴦，有經驗嘅管理樹木員工被調派去管理體育設施，而原本管理體育設施嘅員工反而被派去管理樹木，本末倒置，九唔搭八，有乜法子唔搞到古樹死完一棵又一棵吖。
咪話功夫茶唔提醒，古樹亦係香港歷史嘅一部分，保護古樹不力，唔止損害環保，而且破壞歷史，港產官僚係咪想搞到古樹成為港人集體回憶吖？再講喇，古樹紛紛變癌樹，等於一個個都市炸彈，隨時又搞出人命嘅咋。嗱，雨季就快來臨，當局再唔醒醒定定，做好樹木管理，萬一再出事咯喎，睇吓佢哋又點樣卸責！