病態賭徒格言，有賭未為輸。估唔到特區政府嘅官老爺都有賭仔性格，講得好聽係打不死精神，講得難聽係磨爛蓆作風。即係咁，環境局擴建三個堆填區嘅計劃早前喺立法會觸礁，未投票已經明知毫無勝算而打退堂鼓，點不知一個屈尾十，局長黃錦星又將相關計劃撥款申請遞上立法會，今日由財委會審議。
點解功夫茶話係「相關計劃」，而唔係直接講「擴建三個堆填區計劃」呢？原因係官老爺出咗少少蠱惑，今次申請嘅係基本工程儲備基金撥款，包括三個堆填區嘅設計及建造顧問研究費用，以綑綁形式提上立法會。雖然黃錦星否認偷步，但正如議員話齋，政府將擴建堆填區工程同其他項目一齊綑綁，希望得到財委會通過，企圖蒙混過關。
財委會之所以有必要審批，其實係因為早於上月十八日，立法會工務小組已經批准堆填區有關嘅顧問研究或道路研究等等撥款，合共款額七千五百五十萬元，財委會依家要做嘅決定就係放水定係唔放水。
好嘞，功夫茶問問大家，點解之前擴建三個堆填區嘅計劃觸礁呀？原因係影響環境衞生，加上政府準備不足，諮詢完全不到位，結果反對聲音太大，眾怒難犯之下只好知難而退。既然係咁，今次黃錦星何解又夠膽好似病態賭徒咁，輸完又嚟賭過呀？被問到政府做過乜嘢工作，令佢有信心撥款會通過，黃錦星係咁講嘅，去年暑假已經做過大量工作，包括源頭減廢諮詢，「惜食香港」運動亦進行得如火如荼，又同各個區議會溝通過喎。
先唔理黃局長嘅講法是否廢話，大家不如轉個頭睇睇，深圳發生乜嘢事。香港堆填區擴建項目嘅撥款申請獲得立法會工務小組批准之後，有深圳市人大代表發起「呼籲抵制香港垃圾山簽名活動」，促請深港兩地聯手處理香港堆填區問題，目前已有超過一百萬名深圳居民簽名支持抵制活動，其中包括幾百名當地人大代表同政協委員。亦即係話，一河之隔嘅深圳都頂唔順香港嘅垃圾臭不可耐，你話醜唔醜怪呀！
屢敗屢戰嚴格而言唔係壞事，打不死精神更加係難能可貴，之不過好多時候因人而異。打個譬喻吖，蟑螂係全世界最打不死嘅頑強生物，唔通你樂意見到小強通街走咩？港府對擴建堆填區計劃死心不息，同蟑螂冇乜分別嘅咋。
不如咁講啦，擴建堆填區基本上可以肯定又會被否決，不過家陣港府出咗少少蠱惑，情況或者有變，大家不妨拭目以待等睇戲。