今日係年初三，功夫茶希望大家心平氣和，和氣生財！
點解要強調和氣？無他嘅，一來今日係赤口，相傳易招惹口舌是非，新年流流，萬一拗到面紅耳熱，你話幾冇癮呢。二來咯喎，香港進入是非之年，政治爭拗加劇，民間怨氣累積，如果大家唔想日日赤口，係咪要心平氣和，以和為貴呢？
嗱，玄學家推測馬年運程，香港真係唔平靜。今年係火焚年嘅第二年，即係「火焚三年」嘅大關口，政治爭拗將會比蛇年更頻繁更激烈；加上香港位處馬年是非位，無論係民間定議會內外，都係怒火不斷，爭鬥不休。正所謂，相嗌唔好口，政治爭拗唔止會搞到家嘈屋閉，永無寧日，亦必定會影響經濟及民生，今年尤其要提防金融市場出現劇烈波動。所謂火乘風勢燒三年，香港就算熬過呢個火焚馬年，仲要捱埋下年火焚羊年，先至能夠苦盡甘來，有望享受之後嘅黃金十年。最怕香港依家火氣咁猛，今年究竟會發生乜嘢事，真係冇人可以預測。
大家都知道，今年唔止係火焚年，亦係政改年，建制派同反對派雞同鴨講，佔領中環蓄勢待發，香港處於風口浪尖，根本冇可能平靜。部分政客興風作浪，不良傳媒唯恐天下不亂，對佢哋嚟講，最好日日赤口，日日混亂，咁先至可以渾水摸魚吖嘛。
政治係咁，經濟同民生亦唔好得去邊。火焚年最多係三年啫，而港府施政寸步難行，管治風雨飄搖，可以話年年都係水深火熱。呢，前朝政府得過且過，一事無成，留低一堆爛攤子，房屋、貧窮、安老、醫療、教育等問題千頭萬緒，百孔千瘡，積重難返，就算現屆政府有心做事，都無力回天喇。
提到前朝政府，就不得不提人稱「每周一鑊」嘅周一嶽。佢做食衞局局長八年，結果亂足八年，醫療食物冇樣掂，生老病死樣樣愁，淨係禽流感就搞到雞毛鴨血，直到今日依然禍害無窮。就好似近日咁吖，內地禽流雞殺入本港，當局除咗大開殺戒，仲一刀切禁售活雞，搞到本地雞農及雞販血本無歸，怨聲載道，有位雞販為表示不滿，連續兩日跳海圖以死控訴政府添。內地禽流雞殃及本地雞，咪就係周一嶽埋下嘅禍根囉，業界早就提議將內地及本地活雞分流，佢一於闊佬懶理，甚至連中央屠宰亦束之高閣，簡直害人害物。
總而言之，前朝廢事不堪提，希望現屆政府生生性性，唔好重蹈覆轍。正如玄學家話齋，火焚年忌火氣太盛，一切以和為貴，功夫茶衷心祝願大家笑口常開，和氣生財！